Batys Qazaqstanda sońǵy tórt kúnde 200-ge jýyq adamnan koronavırýs tabyldy

ORAL. QazAqparat – Batys Qazaqstan oblysynda 26-29 qyrkúıekte 196 adamnan koronavırýs tabyldy, dep habarlaıdy QazAqparat tilshisi.

BQO sanıtarlyq-epıdemıologııalyq baqylaý departamenti málim etkenindeı, sonyń 131-inde aýrý belgileri bolsa, 65-i – sımptomy joqtar.

Aýyrǵandardyń 110-y JRVI belgileri boıynsha qaralǵan kezde anyqtalǵan. 47-si buryn indet juqtyrǵandarmen baılanysta bolsa, 39-y profılaktıkalyq maqsatta tekserilgen.

Departament málimetine qaraǵanda, koronavırýs Oral qalasynan kóbirek tabylyp otyr. Munda sońǵy tórt kúnde 89 naýqas belgili bolsa, Báıterekte 36, Bórlide 16, Terektide 14, Aqjaıyq pen Shyńǵyrlaý aýdandarynda 11 adamnan tirkelgen.

Pandemııa bastalǵannan beri oblysta 37 415 adamnan indet tabylyp, sonyń 29 851-i jazylyp shyqty. 761-i kóz jumdy.

Barlyq aýyrǵandardyń 18 793-i Oral qalasy, 4964-i Báıterek, 4555-i Bórli, 1705-i Terekti, 1373-i Aqjaıyq, 1122-si Shyńǵyrlaý, 1093-i Kaztalov, 1029-y Tasqala aýdanynyń úlesine tıedi.

Eske sala keteıik, budan buryn Batys Qazaqstanda koronavırýs juqtyrǵan 40-qa jýyq naýqastyń aýyr halde jatqanyn, 220 myńnan astam adamnyń ekpe saldyrǵanyn jazǵan bolatynbyz.