Batys Qazaqstanda sońǵy on jylda bıýdjet kiristeri 3,5 esege ósti
BQO ekonomıka jáne bıýdjettik josparlaý basqarmasynyń basshysy Tilepbergen Kaıýpovtyń óńirlik kommýnıkatsııalar qyzmeti alańynda ótken brıfıngide málim etkenindeı, óńir bıýdjetiniń kiristeri elimiz táýelsizdik alǵan jyly 1 mln teńge bolsa, 2001 jyly 19,7 mlrd, 2011 jyly 94,5 mlrd teńge jetip, osy on jylda 4,8 esege artty.
Onyń sózine qaraǵanda, bıylǵy túsim jospary 330,8 mlrd teńgeni qurap, sońǵy on jylda 3,5 esege kóbeıip otyr.
Bıylǵy bıýdjet naqtylaýlar men túzetýler esebimen 333,1 mlrd teńgege (sonyń ishinde ózindik kirister – 88,1 mlrd teńge, transfertter túsimi – 210,3 mlrd teńge, basqalary – 39 mlrd teńge) jetip, 2020 jylǵydan 1,3 esege asyp tústi (2019 jyly – 184,4 mlrd teńge, 2020 jyly – 260,5 mlrd teńge).
Basqarma basshysynyń aıtýynsha, oblys bıýdjetiniń shyǵyndary Memleket basshysynyń tapsyrmalaryna sáıkes birinshi kezektegi strategııalyq maqsattardy sheshýge baǵyttalady.
Bıýdjettiń shyǵys bóliginde bıylǵy qarjy 280 mlrd teńgeni (2019 jyly – 148,2 mlrd, 2020 jyly – 208,2 mlrd teńge), damý bıýdjeti 53,1 mlrd (2019 jyly – 31,3 mlrd, 2020 jyly – 41,6 mlrd) teńgeni qurady.
«Oblystyq bıýdjettiń basty baǵyty áleýmettik salany damytý bolyp tabylady. Investıtsııalyq jobalardy iske asyrýdy qosa eseptegende, barlyǵy 150,8 mlrd teńge baǵyttaldy, bul – jalpy bıýdjet kóleminiń 45,3 paıyzy. Sonyń ishinde bilim berýge – 125,8 mlrd, densaýlyq saqtaýǵa – 6,6 mlrd, áleýmettik kómek jáne áleýmettik qamsyzdandyrýǵa – 10,2 mlrd, mádenıet, sport jáne aqparattyq keńistik salasyna 8,2 mlrd teńge bólindi. Basqa da salalarǵa tıisti qarjy qarastyryldy», dedi T.Kaıýpov.
Eske sala keteıik, budan buryn Batys Qazaqstanda elektr qýatyn ósirý 4,1 paıyzǵa óskenin jazǵan bolatynbyz.