Batys Qazaqstanda sońǵy on kúnde 20 oqýshydan koronavırýs tabyldy
ORAL. QazAqparat – Batys Qazaqstan oblysynda 25 mamyrdan beri jazǵy mektepte 19 maýsymǵa deıin bilim alatyn 20 oqýshydan koronavırýs tabyldy, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń málim etkenindeı, óńirlik kommýnıkatsııalar qyzmeti alańynda ótken brıfıngide málim etkendeı, qazirgi kezde oblys boıynsha qala men aýdandar bas memlekettik sanıtar dárigerleriniń qaýlysymen 8 mekteptegi 8 synyp, 4 balabaqshada 4 top karantınge jabyldy.
Jalpy, oqý jyly bastalǵannan beri barlyǵy 1303 oqýshydan (676-sy dástúrli sıpatta, 627-si qashyqtan bilim alady) indet anyqtaldy.
Óńirde pandemııa bastalǵannan beri 22833 adam aýyrsa, maýsym aıynda 275 naýqas tirkeldi.
Muhamǵalı Aryspaevtyń sózine qaraǵanda, sońǵy aptada (28 mamyr – 3 maýsym) aldyńǵymen salystyrǵanda, aýrý juqtyrý kórsetkishi 4,9 paıyzǵa (626-dan 595-ke) tómendedi.
Monıtorıngtik toptar osy aıda 18 reıd júrgizip, 88 nysandy qamtydy. Eki nysanda karantın talabyn buzýshylyq anyqtaldy. 1 hattama toltyrylyp, 43755 teńge aıyppul salyndy.
«Kúni búgin «Ashyq« qosymshasymen oblys boıynsha barlyǵy 481 nysan jumys isteıdi. 1 mamyrdan beri osy jobaǵa qatysatyn nysandarǵa úılerinde oqshaýlanýy tıis, qyzyl jáne sary mártebesi 185 adamnyń kelgeni anyqtaldy. Sonyń ishinde Oralda qyzyl mártebesi bar 72, sarymen 94, Aqsaı qalasynda qyzylmen 9, sary «tústi» 10 adam atalǵan nysandarǵa kirmek bolǵan», dedi Muhamǵalı Aryspaev.
Eske sala keteıik, budan buryn Batys Qazaqstanda jyl basynan beri 13,5 myńnan astam adamnan koronavırýs anyqtalǵanyn jazǵan bolatynbyz.
