Batys Qazaqstanda sońǵy kúnderi birneshe dala órti oryn alyp, adamdar zardap shekti
ORAL. 13 tamyz. QazAqparat - Batys Qazaqstan oblysynda sońǵy kúnderi birneshe dala órti oryn aldy.
Oblystyq tótenshe jaǵdaılar departamentinen túsken málimetke qaraǵanda, 12 tamyz kúni saǵat 16.10-da Bórli aýdanynda dala órti tutanyp, «Tulpar» sharýa qojalyǵynyń traktory otqa orandy. Qyzyl jalyn saǵat 17.20 shamasynda sharýa qojalyǵy jumysshylarynyń kómegimen sóndirildi. Órt 10 gektar jerdi sharpydy. Tótenshe jaǵdaılardyń saldarynan eki jumysshy kúıikke shalynyp, aýrýhanaǵa jetkizildi.
Tasqala aýdanynyń Mereke, Shejin aýyldyq okrýgtarynyń aýmaǵynda demalys kúnderi dalalyq órt boldy. Aýdandyq tótenshe jaǵdaılar bóliminiń málimetine qaraǵanda, qyzyl jalyn 3 myń gektar jerdi sharpyǵan. 10 tamyz kúni túngi saǵat 2.00-de shamasynda bastalǵan qyzyl jalyn 11 tamyz keshki saǵat 19.00 shamasynda aýyzdyqtaldy. Dalalyq órtti sóndirýge aýdandyq №13 órt sóndirý bóliminen bir mashına, alty adam, Oral qalalyq №15 órt sóndirý bóliminen eki mashına, 35 adam jumyldyryldy. Sonymen birge jergilikti turǵyndardan Mereke aýyldyq okrýginen 80 adam, Shejin aýyldyq okrýginen 40 adam órtti aýyzdyqtaýǵa kómek etti. Tilsiz jaýdan bir aýyl turǵyny zardap shegip, úshinshi dárejeli kúıik shaldy. Ol der kezinde oblystyq aýrýhanaǵa jiberildi.
Qazirgi ýaqytta órttiń shyǵý jaǵdaıy men keltirilgen shyǵyn kólemi anyqtalý ústinde.
Jańaqala aýdanynda jyl basynan beri 19 dala órti tirkelip, 2122 ga jer kúlge aınaldy. 10 tamyz kúni soqqan daýyl Jańaqaladaǵy «Aýdanaralyq saýyqtyrý aýrýhanasy» ońaltý ortalyǵynyń 15 sharshy metr shatyry men taǵy birer úıdiń tóbesin ushyryp áketti. Sondaı-aq elektr jelilerine de zardabyn tıgizip, aýdan ortalyǵy birer saǵat jaryqsyz qaldy. Sol kúni oınaǵan naızaǵaı saldarynan Jańajol jáne Jańaqazan aýyldyq okrýgterindegi 216 ga jer otqa orandy. Budan buryn maýsym aıynda tek Pıatımar aýyldyq okrýginiń 750 ga shabyndyǵy men jaıylymy janyp ketti.
Aqjaıyq aýdanynyń Taıpaq aýylynda 10 tamyzda bir turǵynnyń sharýashylyq qurylystarynda ot shyǵyp, 136 sharshy metrdi quraıtyn 2 jazǵy mal orny, 1 jazǵy as ishetin orynnyń tóbesi jáne qamaýda turǵan 3 bas buzaý órtendi. Órttiń sebebi, kelgen shyǵyn men kináliler anyqtalýda. Bul aýdanda maldyń órtke ketýi osymen ekinshi márte oryn alyp otyr
