Batys Qazaqstanda sońǵy eki aıda 272 adam koronavırýstan kóz jumdy

ORAL. QazAqparat – Batys Qazaqstan oblysynda jyl basynan beri 503 adam koronavırýstan kóz jumdy, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmeti málim etkenindeı, sonyń ishinde qańtar aıynda – 28, aqpanda – 15, naýryzda – 30, sáýirde – 41, mamyrda – 57, maýsymda – 60, shildede – 144, tamyzda 128 naýqas qaıtty.

Sońǵy eki aıda ómirden ótkender sany 272-ge jetti. Sońǵy aptada 22 adam jan tapsyrdy.

Qazirgi tańda oblysta 1459 tósektik 20 ınfektsııalyq statsıonarda 524 adam emdelýde. Sonyń ishinde jansaqtaý bólimshesinde 49 naýqas jatyr.

Basqarma málimetine qaraǵanda, indet bastalǵannan beri 34 935 adam koronavırýs juqtyrdy.

Sońǵy aptada tirkelgen naýqastar sany aldyńǵymen salystyrǵanda, 6 paıyzǵa (52-ge) azaıdy.

Jyl basynan beri 2112 baladan indet tabylsa, sonyń 2040-y jazylyp shyqty. 72-si emdelý ústinde.

Eske sala keteıik, budan buryn Batys Qazaqstanda bilim berý mekemelelerine kelýshiler «Ashyq» qosymshasyna sáıkes kire alatynyn jazǵan bolatynbyz.