Batys Qazaqstanda sońǵy aptada koronavırýs juqtyrý deńgeıi 20,5 paıyzǵa ósti
BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaev óńirlik kommýnıkatsııalar qyzmeti alańynda málim etkendeı, aldyńǵy aptada oblysta 519 adam tirkelse, 26 naýryz – 1 sáýir aralyǵynda 653-ke jetti.
Sońǵy táýlikte koronavırýs juqtyrǵandar sany (104) júzden asyp ketti.
Nurlybek Ermekulynyń aıtýynsha, 1 naýryzdan beri 2242 adam tirkeldi. Sonyń 1002-sinen (44,6 paıyzy) JRVI belgileri boıynsha tekserilgende anyqtalsa, 732-si (32,6 paıyzy) buryn aýyrǵandarmen qarym-qatynasta bolǵan.
399-y (17,7 paıyzy) profılaktıkalyq maqsatta qaralǵanda, 109-y (4,8 paıyzy) statsıonarǵa jatqyzar aldynda synama alynǵanda, vırýs juqtyrǵany belgili boldy.
Sondaı-aq osy kezeńde KVI juqtyrǵandarmen baılanysta bolǵan 4396 adam medıtsınalyq baqylaýǵa alyndy.
Aýyrǵandardyń 787-si (35,1 paıyzy) – jumys jasaıtyndar, 600-i (26,7 paıyzy) – zeınetkerler, 453-i (20,2 paıyzy) – jumyssyzdar, 162-si (7,2 paıyzy) – oqýshylar, 66-sy (2,9 paıyzy) – medıtsına qyzmetkerleri, 68-i (3 paıyzy) – muǵalimder.
«Oblysta oqý jyly bastalǵannan beri barlyǵy 636 oqýshydan koronavırýs anyqtaldy. Sonyń ishinde úshinshi toqsanda 11 qańtardan beri 421 oqýshynyń (243-i dástúrli formatta, 178-i qashyqtan bilim alady) aýyrǵany belgili boldy. Qala men aýdandardyń bas memlekettik sanıtarlyq dárigerleriniń qaýlysymen eki mektepte 4 synyp, tórt balabaqshada 4 top, 1 JOO-da eki, 1 orta arnaýly bilim beretin mekemede bir top karantınge jabyldy», dedi N.Mustaev.
Naýryz aıynyń basynan beri monıtorıngtik toptar 642 reıd júrgizip, 5976 nysandy qamtydy. Tórt nysanda karantın talabyn buzýshylyq anyqtaldy. 26 hattama toltyrylyp, 1,7 mln astam teńge kóleminde aıyppul salyndy.
Eske sala keteıik, budan buryn BQO-da sońǵy tórt kúnde 364 adamnyń koronavırýs juqtyrǵanyn, 3 myńnan astam medqyzmetker koronavırýsqa qarsy ekpe saldyrǵanyn jazǵan bolatynbyz.
