Batys Qazaqstanda sońǵy aptada koronavırýs juqtyrý 14 paıyzǵa ósti
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń óńirlik kommýnıkatsııalar alańynda málim etkenindeı, 26 naýryz – 1 sáýir aralyǵynda 653 adamnyń aýyrǵany tirkelse, sońǵy aptada (2-8 sáýir) 760-qa jetti.
Oblysta qańtarda 1837, aqpanda 1950, naýryzda 2138 adam indet juqtyrsa, sáýir aıy bastalǵannan beri 864 adamnan anyqtaldy. Oǵan qosa olarmen baılanysta bolǵan 1523 adam medıtsınalyq baqylaýǵa alyndy.
Syrqattanǵandardyń 312-si (36,1 paıyzy) – jumys isteıtinder, 223-i (25,3 paıyzy) – zeınetkerler, 186-sy (21,5 paıyzy) – jumyssyzdar, 57-si (6,5 paıyzy) – oqýshylar, 28-i (3,2 paıyzy) – medıtsına qyzmetkerler, 17-si (1,9 paıyzy) – muǵalimder.
«Oblysta monıtorıngtik toptar da óz jumysyn jalǵastyrýda. 1 sáýirden beri 217 reıd júrgizilip, 1443 nysan qamtyldy. 11 nysanda buzýshylyq anyqtalyp, 16 hattama toltyryldy. Karantın talabyn buzýshylarǵa 700 myńnan astam teńge aıyppul salyndy», dedi M.Aryspaev.
Eske sala keteıik, budan buryn Batys Qazaqstanda ınfektsııalyq statsıonarda jatqandar sany 500-ge jýyqtaǵanyn, óńirge taǵy 14 myń doza vaktsına jetkizilgenin jazǵan bolatynbyz.
