Batys Qazaqstanda shekteý sharalary kúsheıtiledi
ORAL. QazAqparat – Batys Qazaqstan oblysynda shekteý sharalary kúsheıtildi, dep habarlaıdy QazAqparat tilshisi.
Batys Qazaqstan oblysy memlekettik bas sanıtar dárigeriniń 17 qazannan bastap kúshine enetin qaýlysyna sáıkes memlekettik shekaradaǵy ótkizý beketterinde sanıtarlyq talaptar qatańdatyldy.
Qaýlyǵa sáıkes tranzıttik júk tasymaldaıtyn halyqaralyq avtokólikter oblys aýmaǵy arqyly toqtaýsyz ótedi.
Qazaqstannyń úkimettik delegatsııalaryn, QR Syrtqy ister mınıstrliginiń shaqyrýy boıynsha keletin shet memleketter men halyqaralyq uıymdardyń resmı delegatsııalary múshelerin, elimizde akkredıttelgen dıplomatııalyq ókildikterdiń, konsýldyq mekemelerdiń jáne halyqaralyq uıymdar ókildikteriniń qyzmetkerlerin jáne olardyń otbasy múshelerin, sondaı-aq tranzıttik júk kólikterin qospaǵanda, shekarany kesip ótken kezde kem degende 72 saǵat buryn PTR ádisimen alynǵan anyqtamasy joq adamdar COVID-19-ǵa zerthanalyq tekserýden ótý úshin karantındik statsıonarlarǵa barýǵa mindetti.
Statsıonarlar myna mekenjaılarda ornalasqan: Bórli aýdany, Caspian Offshore Construction Realty, Tasqala aýdany Tasqala kenti, Rysqulbekov kóshesi 4A, «Jas týrıster stantsııasy» KMM-nyń «Shuǵyla» saýyqtyrý lageri, Jánibek aýdany Jánibek aýyly, Jeńis kóshesi, 17A, Jánibek aýdandyq aýrýhanasy, Oral qalasy, «Ivýshka» sanatorııi kóshesi, 1 qurylys, oblystyq týberkýlezge qarsy dıspanser.
Sondaı-aq kópshilik is-sharalarmen qatar barlyq oıyn-saýyq nysandarynyń, kınoteatrlardyń, fýdkorttardyń, banket zaldarynyń, oıyn alańdarynyń (aýlalardaǵyny qospaǵanda), túngi klýbtardyń, barlardyń, karaoke, kompıýterlik jáne oıyn klýbtarynyń, kalıandyq, býkmeker keńseleriniń, keıterıngtik jáne merekelerdi uıymdastyrý boıynsha qyzmetter kórsetýdiń, menshik nysanyna qaramastan, mektepke deıingi balalar mekemeleriniń (kezekshi toptardy qospaǵanda) qyzmetine tyıym salyndy.
Memlekettik organdar men kvazımemlekettik sektor uıymdarynyń qyzmetkerleriniń keminde 50 paıyzy qashyqtan jumys isteýge kóshedi. Basqa da mekemelerge qatysty shekteý sharalary engizildi.
Demalys jáne mereke kúnderi jabyq azyq-túlik emes jáne azyq-túlik bazarlary jabylady.
Qoǵamdyq avtokólik shekteýli rejım sheńberinde jumys kúnderi: saǵat 07.00-den 23.00-ge deıin, senbi, jeksenbide: saǵat 07.00-den 21.00-ge deıin, birkelki qozǵalys kestesimen qatynaıdy. Qarbalas saǵattarda qoǵamdyq kólikter barynsha kóp shyǵýy tıis.
Sońǵy aıaldamalarda qoǵamdyq avtokólikterge kúndelikti dezınfektsııa júrgiziledi. Qoǵamdyq kólikke jolaýshylar otyrǵyzý oryndaryna sáıkes minedi.
Qoǵamdyq kólik antıseptıkalyq quraldarmen qamtamasyz etilýi tıis, qoǵamdyq kólikke tek jeke qorǵanysh quraldarymen (medıtsınalyq betperdelermen, qolǵaptarmen) kirýge ruqsat etiledi.
Jeńil kólikte (taksı) otyratyndar úsh adamnan artyq bolmaýy kerek. Olar da jeke qorǵanysh quraldarymen (medıtsınalyq betperdelermen, qolǵaptarmen) jáne antıseptıktermen qamtamasyz etilýi tıis.
Eske sala keteıik, budan buryn BQO-da koronavırýstan qaıtqandardyń 70 paıyzdan astamy egde adamdar ekendigin, Reseı shekarasynan Qazaqstanǵa ótken 8 adamnan indet anyqtalǵanyn jazǵan bolatynbyz.
Sondaı-aq koronavırýs shyqqan balabaqsha karantınge jabyldy.
