Batys Qazaqstanda saılaýǵa 5 myńdaı baıqaýshy qatyspaq

ORAL. QazAqparat – Batys Qazaqstan oblysynda 10 qańtar kúni ótetin Májilis jáne máslıhat depýtattaryn saılaýǵa 5 myńdaı baıqaýshy qatyspaq, dep habarlaıdy QazAqparat tilshisi.

Oblystyq saılaý komıssııasynyń tóraǵasy Ǵaısa Qapaqovtyń málim etkenindeı, sonyń ishinde eki halyqaralyq baıqaýshy EQYU atynan Chehııa men Shvetsııadan kelmek.

Sondaı-aq Saratov oblysynan 6, Samaradan 4, Reseıdiń Oral qalasyndaǵy bas konsýldiginen 2 baıqaýshy qatyspaq. Oǵan qosa saıası partııalar óz baıqaýshylaryn jiberetin bolady. Oblys boıynsha 170-ten astam uıymnyń saılaýda baıqaýshy bolýǵa quqyǵy bar. Sanıtarlyq talapqa sáıkes komıssııa músheleri men baıqaýshylar PTR test qorytyndysy týraly anyqtamalaryn alyp kelýi kerek.

Ǵ.Qapaqovtyń sózine qaraǵanda, partııalyq tizim boıynsha «Nur Otan» 350, «Aýyl» 40, «Aqjol» 35, «Adal» partııasy 29 kandıdat usyndy. Qazaqstan halyq partııasy úmitkerlerin Májilis saılaýyna ǵana qospaqshy.

Barlyq 454 kandıdattyń 217-si nemese 47,4 paıyzy – jastar men áıelder.

Oblystyq máslıhatqa – 31, qalalyqqa – 22, aýdandyq máslıhattarǵa – 147, barlyǵy 200 depýtat saılanbaqshy.

Saılaýdy ótkizý úshin Batys Qazaqstan oblysyna 460 mln astam teńge bólindi. Onyń 89 paıyzy eńbekaqy esebinde tólenedi. Óńirde saılaý komıssııalarynyń 3259 múshesi bar.

«Koronavırýs indetine baılanysty barlyq saqtyq sharalary qolǵa alyndy. Komıssııa músheleri jeke qorǵanysh quraldarymen, betperde, qolǵap, kózildirikpen qamtamasyz etildi. Olardyń qyzýy turaqty túrde ólshenedi. Saılaýshylar arasynda da áleýmettik araqashyqtyq saqtalady. Saılaý ýchaskelerinde sanıtaızerler ornatylyp, antıseptıkter qoıylady. Aýa kelip turýy úshin daýys berý kabınalarynyń aldyńǵy jaǵy ashyq bolady. Eger saılaýshy betperde taǵýdy umytyp ketse, onymen de qamtylady», dedi QazAqparat tilshisine Ǵ.Qapaqov.

Eske sala keteıik, Batys Qazaqstanda 505 ýchaskelik saılaý komıssııasy jumys isteıdi.