Batys Qazaqstanda sábizge qaqalyp qalǵan sábı kóz jumdy
Terekti aýdandyq aýrýhanasynan túsken málimetke qaraǵanda, qaıǵyly oqıǵa 31 jeltoqsan kúni aýdan ortalyǵy Terekti aýylynda bolǵan. Saǵat 13:20-da 1 jas 7 aılyq sábı Terekti aýdandyq aýrýhanasynyń qabyldaý bólmesine jetkizilgen. Onda tirshilik belgileri bolmaǵan. Kezekshi dáriger men medıtsına qyzmetkerleriniń jedel jansaqtaý sharalaryn júrgizgenine qaramastan, jarty saǵattan keıin, 13:50-de bıologııalyq ólim tirkeldi.
«Anasynyń sózine qaraǵanda, úıinde oınap júrgen ul bala shıki sábiz jegen. Qatty jótelgenin estigennen keıin oǵan júgirip jetken anasy kómektespek bolyp, arqasynan qaqqan. Sábizdiń bir bóligi shyqqanymen, bala kógerip, tynys alýy qıyndap ketken. Jedel járdem shaqyryp, balany kóterip kóshege shyǵyp, ótip bara jatqan avtokólikpen aýrýhanaǵa ákelgen. Balany qaraǵan kezde ol demalmaǵan, basqa da tirshilik belgisi bolmaǵan. Barlyq is-sharalar júrgizilgennen keıin polıtsııaǵa habarlanǵan. Balanyń múrdesi ýchaskelik dáriger men polıtsııa qyzmetkeriniń qatysýymen sot-medıtsınalyq saraptamaǵa jiberildi. Sot-medıtsınalyq saraptama júrgizgen maman balanyń tunshyǵyp qaıtqany, tynys alý joldarynyń bógde zatpen (sábizben) bitelip qalǵany jóninde anyqtama berdi», - dep habarlady aýrýhanadan.
Oqıǵany BQO densaýlyq saqtaý basqarmasy rastap, Terekti aýdany boıynsha 1,7 jasar balanyń ólimi tirkelgenin jetkizdi.