Batys Qazaqstanda «Rýhanı jańǵyrý» baǵdarlamasyna oraı jańa jobalar qolǵa alynýda
Osyǵan oraı BQO ákimdigi ǵımaratynda jergilikti atqarýshy organdarmen jumysty úılestirý jáne «Rýhanı jańǵyrý» baǵdarlamasynyń jobalaryn ilgeriletý maqsatynda óńirlik joba keńsesi iske kiristi. Keńse jetekshisi - oblystyq máslıhattyń eń jas depýtaty Saltanat Tumanbaeva. Sondaı-aq oblysta atalmysh baǵdarlamany júzege asyrý boıynsha sarapshylar keńesi qurylyp, aýdandarda jumys toby jasaqtalmaq.
«Rýhanı jańǵyrý» baǵdarlamasy aıasynda jańa, tyń jobalar jasaqtaý - basty mindet. Memleket basshysynyń qoıǵan maqsat-mindeti de osyndaı: «Jańa jaǵdaıda jańǵyrýǵa degen ishki umtylys - bizdiń damýymyzdyń eń basty qaǵıdasy. Ómir súrý úshin ózgere bilý kerek. Oǵan kónbegender tarıhtyń shańyna kómilip qala beredi» degen bolatyn Elbasy óz maqalasynda.
Óńirde «Jaıyq Press» JShS bas dırektory Jantas Safýllınniń jetekshiligimen birneshe jyldar boıy epıgrafıkalyq eskertkishterdi zerttep júrgen «Qulpytas syryn ashaıyq», Batys Qazaqstannyń tarıhı, kıeli oryndary jóninde beınerolıkter túsirip júrgen «Deshti Qypshaq dalasy», Reseı muraǵattaryndaǵy tarıhı derekterdi jınaqtaý jobalary osy baǵdarlamanyń aıasyna dóp keledi. Alashtyń 100 jyldyǵymen qatar kelgen oblystyq «Oral óńiri» men «Prıýrale» gazetterine 100 jyl tolýyna oraı «Jaıyq Press» JShS-da biraz is tyndyryldy. «Oral óńiri» gazetiniń bastaýynda turǵan «Qazaqstan», «Uran», «Izvestııa-Habar», «Kırgızskaıa pravda» - «Qazaq durystyǵy», «Durystyq joly», «Ushqyn» (respýblıkalyq «Egemen Qazaqstan» gazetiniń izashary) gazetteri jınaqtalyp, jeke kitap bolyp jaryq kórdi. Sońǵy bes jyl ishinde oblystyń baspasóz tarıhy týraly on kitap jaryq kórdi. Oǵan qosa gazetterdiń 100 jyldyq tigindisi baspasózdiń qara shańyraǵyna jınaqtalyp, elektrondyq nusqalary jasaldy.
J.Safýllınniń sózine qaraǵanda, «Rýhanı jańǵyrý» baǵdarlamasyna baılanysty sharalar budan bylaı da jalǵasady. Mysaly, baspasóz tarıhyna qatysty kórnekti tulǵalardyń kóne sýretteri jınaqtalýda. Sondaı-aq Bashqurtstan muraǵattarynda HІH ǵasyrda qazaq meshitterinde toltyrylǵan metrıkeler saqtalǵan. Bul qujattar sol kezeńge tarıhı saraptama jasaýǵa negiz boldy. Árıne, tarıhı eskertkishterdegi, muraǵattardaǵy málimetterdi jınaý ońaı sharýa emes. Oǵan mamandar tartylýy qajet. Osy bastalǵan ǵylymı jumystardy jalǵastyrý úshin «Rýhanı jańǵyrý» baǵdarlamasynyń «Týǵan jer» baǵytyna alty birdeı joba usynyldy.
Batys Qazaqstan oblysynyń ishki saıasat basqarmasy «Týǵan jer» kishi baǵdarlamasy aıasynda oblystaǵy 12 aýdanǵa press-týrlar uıymdastyrmaq. Árbir aýdannyń kórikti jáne kıeli jerleri, óńirdiń damýyna úles qosqan azamattar týraly BAQ-qa materıaldar shyǵarý kózdelýde. Sondaı-aq, «Jyldyń úzdik metsenaty», «Jyldyń úzdik volonteri», «Jyldyń úzdik ÚEU», «Jomart júrek» atty sharalar men «Qoǵamdyq pikirtalas klýbynyń» otyrystary, «Áleýmettik mańyzdy jobalar men ıdeıalardyń jármeńkesi» jáne ólketaný boıynsha onlaın oqytýlar ótkizilmek.
Shekaralyq yntymaqtastyqty nyǵaıtý maqsatynda kórshiles Reseı oblystarynyń etnomádenı ortalyqtarynyń qatysýymen «Dostyqta shekara joq» festıvali josparlandy.
