Batys Qazaqstanda respýblıkalyq joldarda kólik qozǵalysyna tyıym salyndy

ORAL. QazAqparat – Batys Qazaqstan oblysynda burqasynǵa baılanysty respýblıkalyq joldarda qozǵalys shekteldi, dep habarlaıdy QazAqparat tilshisi.

«QazAvtoJol» UK» AQ baspasóz qyzmeti málim etkendeı, 14 naýryz kúni elorda ýaqytymen saǵat 21.00-den bastap respýblıkalyq mańyzy bar Samara-Shymkent (195-251 km, Reseı shekarasynan Oralǵa deıin), Oral-Tasqala-RF shekarasy (4-104 km, Oraldan Reseı shekarasyna deıin) joly barlyq kólik túrleri úshin jabyldy.

Atalǵan jol bólikterinde jel kúsheıip, burqasyn kóterilgen. Sonyń saldarynan joldyń kórinýi nasharlaǵan.

Osyǵan baılanysty BQO TJ departamenti eskertý jarııalanǵanyn jetkizdi.

Eske sala keteıik, budan buryn Oral-Tasqala-RF shekarasy trassasy áli jabyq turǵanyn jazǵan bolatynbyz.