Batys Qazaqstanda respýblıkalyq ánshi-termeshiler baıqaýy márege jetti
ORAL. QazAqparat - Batys Qazaqstanda belgili ánshi-termeshi, Qazaqstannyń eńbek sińirgen ártisi Qalamqas Orashevaǵa arnalǵan «Kómeıinde kúmis jyr» atty ІV respýblıkalyq qyz-kelinshekter baıqaýy márege jetti, dep habarlaıdy QazAqparat tilshisi.
Ómirden erte ketken Qalamqas Orashevanyń (1953-1988) týǵan jeri - Aqjaıyq aýdanynda ótken ánshi-termeshilerdiń baıqaýyna elimizdiń óńirleri men Astana, Almaty qalalarynan barlyǵy 18 úmitker qatysyp, baq synady. Solardyń 14-i ekinshi kezeńge ótti.
Dodaǵa túskender kezinde Qalamqas oryndaǵan Nurpeıistiń «Narqyz», «Tórehan», Mahambet pen Bazar jyraýdyń tolǵaý-termelerin, ánshiniń ustazy Ǵarıfolla Qurmanǵalıevtiń týyndylaryn oryndady.
Qazylar alqasynyń sheshimimen Qalamqas Orasheva atyndaǵy bas júldeni (500 myń teńge) oraldyq Ámına Ǵaınedınova jeńip aldy. Qyzylordalyq Zúlfııa Baımurzıeva birinshi (350 myń teńge), mańǵystaýlyq Janar Nurmuhanova ekinshi (200 myń teńge), oraldyq Aqmaral Kemelhanova úshinshi (100 myń teńge) ıe boldy. 75 myń teńgeden Jaqsylyq Sársenǵalıev atyndaǵy júlde Jańaózen qalasynan kelgen Dámegúl Іzbasarovaǵa, Qalampyr Rahımova atyndaǵy júlde almatylyq Janargúl Sárkenovaǵa, Amangeldi Ǵubaıdýllın atyndaǵy júlde atyraýlyq Arýjan Erimovaǵa, Kósherǵalı Makarov atyndaǵy syılyq astanalyq Zınat Qasymovaǵa tabys etildi.
Belgili ánshi, Qazaqstannyń eńbek sińirgen qaıratkeri, qazylar alqasynyń tóraǵasy Qatımolla Berdiǵalıev ulttyq ónerdi nasıhattaýshylar men toıdy ótkizýge atsalysqandardyń bárine rızashylyǵyn bildirdi.
«Qalamqas Orashevanyń termeshilik-jyrshylyq ónerin jalǵap, alǵa aparý - barshamyzdyń paryzymyz. Týma talantymen halqyna tanylyp, júrekterge jol tapqan ánshiniń esimi eli barda eshqashan umytylmaq emes. Rýhy jańǵyryp, Aq Jaıyq aspanynda ánderi qalyqtaı beretini anyq», - dedi oblystyq mádenıet, arhıvter jáne qujattama basqarmasynyń basshysy Qadyrbolat Musaǵalıev.
