Batys Qazaqstanda polıtsııa qyzmetkeri eki balany qutqaryp qaldy
BQO polıtsııa departamentiniń baspasóz qyzmetkeri, polıtsııa maıory Darıǵa Májıtovanyń aıtýynsha, oqıǵa 30 mamyr kúni Báıterek aýdany Pogodaev aýylynda boldy.
BQO polıtsııa departamenti kınologııa ortalyǵynyń ınspektory, polıtsııa kishi serjanty Erjan Qýanyshev sol kúni demalys ýaqytyn paıdalanyp, ata-anasyna barǵan.
«Toǵan janyna avtokólikpen barǵan kezde 7-8 jasar bir top balanyń oınap júrgenin kórgen. Sýǵa jaqyndamaýyn eskertip, az ýaqytqa mashınasyna ketken. Qaıta oralǵan kezde bir balanyń batyp bara jatqanyn, ekinshisiniń sýǵa tunshyǵyp qalǵanyn kórgen. Sol boıda sýǵa sekirip, ekeýin de qutqaryp úlgergen. Esinen tanyp qalǵan balaǵa alǵashqy medıtsınalyq járdem kórsetken», - dedi D.Májıtova.
Bul oqıǵa týraly polıtsııa qyzmetkerleri 1 mamyr kúni kezdeısoq bilgen. Áńgime arasynda E.Qýanyshev baıqamaı aıtyp qalǵan.
«Balalar júzý bilmeıdi eken ári aıqaılap kómekke shaqyrǵan da joq. Toǵan jaqtan esh dybys bolǵan joq. Men olardy qutqaryp qalǵanymdy keıin sezindim. Muny erlik dep eseptemeımin», - dedi E.Qýanyshev.
Aýyl mektebiniń dırektory E.Qýanyshevqa alǵysyn bildirip, qurmet gramotasyn tabys etti.
Eske sala keteıik, budan buryn BQO-da 13 jasar balanyń sýǵa ketip qala jazdaǵanyn jazǵan bolatynbyz.
Shyńǵyrlaý aýdany Shyńǵyrlaý aýylynyń turǵyny Denıs Lıpın 13 jasar balany qutqaryp qalǵan edi.
Búgin D.Lıpın men E.Qýanyshev BQO TJ departamentiniń bastyǵy atynan alǵyshatpen marapattaldy.
Sondaı-aq vedomstvolyq nagradamen marapattaý týraly sheshim qabyldaý jáne qaraý úshin ýákiletti organǵa materıaldar jiberildi.
