Batys Qazaqstanda pnevmonııamen 1 600 adam aýyrdy
ORAL. QazAqparat – Batys Qazaqstan oblysynda pnevmonııamen 1 600 adam aýyrdy, dep habarlaıdy QazAqparat tilshisi.
BQO Densaýlyq saqtaý basqarmasynyń basshysy Bolatbek Qaıýpovtyń brıfıngide málim etýinshe, óńirde koronavırýsqa shaldyqqandar sany 4 837-ge jetti. Onyń ishinde 3 655 adam jazylyp shyqsa, 22-si kóz jumdy.
Sonymen qatar 1 600 adam pnevmonııamen syrqattansa, olardyń 260-sy provızorlyq, 608-i juqpaly aýrýlar statsıonarynda, sondaı-aq 732-si ambýlatorııalyq em alyp jatyr.
Oblysta 10 adam ókpeni jasandy jeldetý apparatyna qosylǵan. Oǵan qosa aýyr haldegiler qataryna teńestirilgen taǵy 110 emdelýshi ottegi kontsentratorymen tynys alýda.
«Qazirgi tańda koronavırýstan emdeýge 29 medıtsına uıymy (1 628 tósek-oryn) jumyldyrylǵan. Júktemeniń artýyna baılanysty jedel járdem brıgadalarynyń sany 63-ke jetti, bul ótken jylǵydan 26 kólik kóp. Jaǵdaıy aýyr naýqastar arasynda ólim-jitimniń aldyn alý maqsatynda 60 jedel brıgada jumys istep, barlyq aýdandy qamtýda. Biryńǵaı baılanys júıesinde táýlik boıy úsh aýysymda call-ortalyqta shtattan tys mamandar ambýlatorlyq em alý úshin qashyqtan keńes berýde. Barlyǵy 60 131 PTR test jasalsa, munyń táýliktegi sany 950-ge jetti», - dedi B.Qaıýpov.
Memlekettik tapsyrysty 5 zerthana oryndaýda. Sonyń tórteýi – memlekettik mekeme.
Oblysta barlyǵy 130 jasandy tynys alý apparaty bolsa, sonyń 78-i juqpaly aýrýlar jáne provızorlyq statsıonarda iske qosylǵan. «Oral Med Regıon» JShS aıyna mundaı apparattyń 10-yn shyǵara alady. Qazirdiń ózinde seriktestik 8-in jasap úlgerdi. Óńirde sondaı-aq 217 ottegi kontsentratory, 198 ottegi kózi, 8 kompıýter tomografy, 26 rentgen-apparat jáne 373 pýlsoksımetr bar.
Kúni búgin óńirde aldyńǵy shepte 1837 medıtsına qyzmetkeri eńbek etip jatsa, sonyń 270-i – dárigerler, 944-i – orta, 406-sy – kishi býyn qyzmetkerleri.
B.Qaıýpovtyń sózine qaraǵanda, juqpaly aýrýlar jáne provızorlyq statsıonarlarda 286 medıtsına kadry jetispese, sonyń 27-si – dárigerler. 115 orta, 144 kishi qyzmetker de qajet. JOO-lar men medıtsına kolledjderi túlekteri esebinen 200 adamnan turatyn kadr rezervi jasaqtaldy.
Oblystyq densaýlyq saqtaý basqarmasynyń basshysy dári-dármekpen qamtýda da tıisti sharalar qolǵa alynǵanyn atap ótti.
Brıfıngige qatysqan Reseıden kelgen mamandar tobynyń jetekshisi, dáriger-epıdemıolog Pavel Gýsev kez kelgen jastaǵy balalardyń, tipti jańa týǵan náresteniń koronavırýs juqtyryp alýy múmkin ekendigin jetkizdi. Koronavırýs balalarda aýrý belgisinsiz nemese aýyr túrde ótýi yqtımal. Bul jerde dert olardyń jasyna qaramaıdy. Jalpy, indetpen úlken de, kishi de aýyratynyn eskerý kerek.
Dárigerdiń sózine qaraǵanda, eki elde de koronavırýstyń taralýynda, ony emdeýde uqsas jaqtary bar. Reseıde qazirgi tańda koronavırýspen aýyrǵandar arasynda ımmýnıtettiń qalyptasý máselesine monıtorıng júrgizilýde. Antıdene bar, biraq onyń adamnyń aǵzasynda qansha ýaqytqa deıin bolatyny áli anyqtala qoıǵan joq.
«Qazirgi kezde Reseımen qatar Qazaqstanda emdeý algorıtmine vırýsqa qarsy preparat – favıpıravır qosyldy. Ol saýda júıesinde avıfavır degen ataýmen belgili. Bul dári-dármek Ebola vırýsyn emdeýde tıimdi ekendigin kórsetti. Bir aıtaıyn degenim, Qazaqstanda sońǵy kezde indetke shaldyqqandar sany kóbeıip ketip otyr. Sondyqtan ara qashyqtyqty saqtap, betperde kıip, basqa da sanıtarlyq talaptardy buljytpaı oryndaǵan jón dep aıtqym keledi», dedi P.Gýsev.
Eske sala keteıik, Batys Qazaqstanda toı ótkizgen turǵyndarǵa 1,5 mln teńge aıyppul salyndy.
