Batys Qazaqstanda pishenniń órtenýi jıilep tur
ORAL. QazAqparat – Batys Qazaqstan oblysynda pishenniń órtenýi jıilep tur, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, tek keshe bir kúnniń ishinde úsh birdeı oqıǵa tirkeldi.
Keshe saǵat 16.15-te Bórli aýdany Qaraqudyq aýylynda Abylaı han kóshesindegi jeke úıdiń aýlasynda 17 tonna pishenniń janǵany jóninde málimet túsken. Órtti sóndirýge 4 adam 1 tehnıkamen bardy. «Tilsiz jaý» búgin saǵat 05.15-te aýyzdyqtaldy.
Sol sekildi saǵat 16.50-de Jánibek aýdany Jánibek aýylynda Sársenov kóshesindegi jeke úıde 4 tonna pishen otqa oranǵan. Ony 4 adam 1 tehnıkanyń qatysymen saǵat 20.58-de sóndirdi.
Saǵat 18.50-de Qaztalov aýdany Jalpaqtal aýylynda Qurmanǵazy kóshesinde jeke úıdiń aýlasynda 4 tonna pishen men qora-qopsy (aýmaǵy – 35 sharshy metr) órtendi. Órtti sóndirýge 3 adam, 1 tehnıka baryp, búgin saǵat 02.20-da aýyzdyqtalǵan.
Qazirgi kezde atalǵan órtterdiń shyǵý sebepteri, kináli adamdar, keltirilgen shyǵyn anyqtalyp jatyr.
Eske sala keteıik, budan buryn Bókeı ordasy aýdany Bısen aýylynda 5 tonna pishenniń órtenip ketkenin jazǵan bolatynbyz.
