Batys Qazaqstanda pedagogtardyń 95,1 paıyzy ekpemen qamtyldy
BQO bilim basqarmasynyń basshysy Aıgúl Myńbaevanyń óńirlik kommýnıkatsııalar qyzmeti alańynda ótken brıfıngide málimdeýinshe, bilim berý uıymdarynyń tehnıkalyq qyzmetkerlerinen 96 paıyzy vaktsına qabyldaǵan.
Aıgúl Myńbaevanyń aıtýynsha, 2021-2022 oqý jyly dástúrli sıpatta ótetin bolǵandyqtan, bilim berý uıymdarynda sanıtarlyq-epıdemıologııalyq talaptar saqtalatyn bolady.
Atap aıtqanda, kún saıyn sanıtarlyq-zalalsyzdandyrý is-sharalary atqarylyp, bir synypqa bir kabınet bekitilip, úzilister ár túrli ýaqytta uıymdastyrylady.
«Mektepke kireberiste muǵalimder men tehnıkalyq qyzmetkerlerge, ata-analarǵa Ashyq qosymshasy qoldanylyp, bilim berý uıymdary jeke qorǵanys jáne zalalsyzdandyrý quraldarymen tolyqtaı qamtylady. Al qaýipti aýrýlar tobyndaǵy, ata-analary COVID-19-ben syrqattanǵan jáne naýqaspen baılanysta bolǵan balalar qashyqtan oqytýǵa aýystyrylady», - dedi A.Myńbaeva.
Basqarma basshysynyń sózine qaraǵanda, «Pedagog mártebesi týraly» jáne «Keıbir zańnamalyq aktilerine ózgerister men tolyqtyrýlar engizý týraly» QR Zańyna sáıkes orta bilim berý uıymdary pedagogteriniń bir aptaǵa normatıvtik oqý júktemesi 16 saǵatqa deıin tómendetildi.
Qazirgi tańdaǵy asa mańyzdy máseleniń biri balalar qaýipsizdigi bolǵandyqtan, barlyq mektepter beınebaqylaý júıesimen tolyqtaı qamtyldy. Oral jáne Aqsaı qalasynda ornalasqan 58 mektepte arnaýly kúzet engizý kózdelýde. 97 mektepte bilim berý ortalyqtandyrylǵan jedel basqarý júıesine qosylatyn bolady.
Taǵy bir ózgeris, 2021-2022 oqý jylynan bastap dene shynyqtyrý muǵalimderine sektsııalar men úıirmeler ótkizgeni úshin qosymsha aqy tólenedi. Oǵan respýblıkalyq bıýdjetten 110 mln teńge qarajat qarastyryldy. Osyǵan oraı 3 saǵat qosymsha sabaqtar júrgiziledi.
Óńirde jańa oqý jylynda 372 memlekettik mektepte 113 myńǵa jýyq oqýshy, 5 jeke bilim ordasynda 600-den astam shákirt bilim alady dep josparlanýda.
