Batys Qazaqstanda ózenderde sý deńgeıi kóterilip jatyr
«Qazgıdromet» RMK BQO fılıalynyń dırektory Tilegen Shapanovtyń óńirlik kommýnıkatsııalar qyzmeti alańynda ótken brıfıngte málim etkenindeı, oblysta 11 naýryzda kúnniń 4-13 gradýsqa deıin jylynýyna baılanysty shaǵyn ózenderde sý deńgeıi joǵarylady.
Atap aıtqanda, Tasqala aýdanynda Shejin-2 ózeninde sý deńgeıi 779 santımetrge kóterilip, qaýipti shekke jetti. Tasqala aýylyndaǵy gıdrobekette Derkól ózeninde 555 santımetrge jetip, qaýipti deńgeıden 25 santımetrge asyp tústi.
T.Shapanovtyń sózine qaraǵanda, Shiderti, Óleńti jáne Shaǵan ózenderinde de sý deńgeıi kóterilý ústinde.
«Aldaǵy kúnderi kúndiz 8-14 gradýs, túnde 0-5 gradýs jylylyq saqtalyp, qardyń erýi jalǵasady. Oǵan qosa oblystyń birqatar bóliginde jańbyr jaýýy yqtımal. Oblystyń soltústik, soltústik-shyǵys jáne shyǵys bóliginde qar jamylǵysy saqtalýda. Qardyń bıiktigi – 1-19 santımetr. Óńirde bıylǵy tońnyń qalyńdyǵy – 80-140 santımetr. Bul erigen qar sýynyń jerge sińbeı, ózenderge quıylyp, olardaǵy sý deńgeıiniń kóterilýine ákelip soǵady. «Qazgıdromet» mekemesiniń málimetine sáıkes 12-14 naýryz aralyǵynda jaýyn-shashyn bolyp, qar qatty erıdi. Soǵan baılanysty sý tasqyny bolýy múmkin», dedi T.Shapanov.
Eske sala keteıik, budan buryn Batys Qazaqstanda jaǵdaı kúrdelene túskenin jazǵan bolatynbyz.
Sondaı-aq Oralda medkolledj jataqhanasyna sý kirdi.
BQO-da Oral qalasy men eki aýdanda sý tasýyna baılanysty tótenshe jaǵdaı jarııalanýy múmkin.