Batys Qazaqstanda ósimdik maıyn óndiretin zaýyt qaıta iske qosyldy
ORAL. QazAqparat - BQO-nyń Terekti aýdanynda jańǵyrtýdan keıin ósimdik maıyn óndiretin «Terekti maı kombınaty» JShS zaýyty qaıta iske qosyldy, dep habarlaıdy QazAqparat tilshisi.
Osyǵan oraı búgin kásiporynda bolǵan oblys ákimi Altaı Kólginov atalmysh zaýytqa memleket tarapynan úlken qoldaý kórsetilgenin atap ótti. Kóp qarajat quıylyp, jańadan tehnologııalar ákelindi. Sonyń nátıjesinde jańa jumys oryndaryn ashyp, óńir qajetin óteýmen birge shetelge ónim shyǵarýǵa múmkindik týyp otyr. Ekinshiden, bul sharýa qojalyqtaryna da tıimdi. Olar ósirgen maıly daqyldaryn osynda ótkizedi.
Poıma aýylyndaǵy kúnbaǵys maıyn óndiretin zaýyt bastapqyda 2009 jyly ashylǵanymen, burynǵy ıeleri onyń jumysyn alyp kete almady. 2014 jyly jańa ınvestor tartylyp, turalap qalǵan kásiporyn qaryzyn óteýmen birge óndiristi tehnıkalyq jaǵynan jańǵyrtýdy qolǵa aldy.
Investor «Beles-Agro» kompanııalar tobynyń jetekshisi Murat Jákibaevtyń aıtýynsha, jańǵyrtý jumystaryna barlyǵy 2,3 mlrd teńge ketti. Munda ornatylǵan eýropalyq qural-jabdyqtar men zamanaýı tehnologııa óndiris kólemin eki esedeı arttyrýǵa múmkindik beredi. Mysaly, buryn jylyna 20 myń tonna shıkizat óńdelse, qazir 45 myń tonnaǵa jetedi. Buryn maıly daqyldardan 30 paıyz maı alynsa, endi jańa jeli arqyly 43 paıyzǵa deıin alýǵa bolady. Bylaısha aıtqanda, buryn táýligine 70 tonna shıkizat óńdelip, 20 tonna maı alynsa, qazir bul kórsetkishter sáıkesinshe 144 tonna jáne 50 tonnaǵa jetip otyr. Jańadan bý qazandyǵy ornatylyp, shıkizat daıyndaıtyn, dándi syǵymdap, tazartatyn, ekstraktsııalaıtyn tsehtar iske qosyldy. Dáninen ajyratylǵan kúnbaǵys qabyǵy jaǵylyp, odan bý óndiriledi. Aldaǵy ýaqytta bý qazandyǵyn jylyjaı sharýashylyǵy men mal azyǵyn daıyndaýǵa da paıdalanýǵa bolady.
Kúni búgin zaýytta 100-den astam adam turaqty eńbek etedi.
Munda ósimdik maıynyń «Beles» kúnbaǵys maıy dep atalatyn eki túri, ıaǵnı tazartylǵan, ıissizdendirilgen, muzdatylǵan, oǵan qosa rafınadtalmaǵan túrleri óndiriledi. Zaýyt ónimderi Batys Qazaqstan, Aqtóbe, Atyraý oblystarynda satylýda. Jaqynda «Beles» maıynyń 50 tonnasy Ózbekstanǵa jóneltildi. Eń bastysy, ónim halyqaralyq talaptarǵa saı keledi.
Aldaǵy ýaqytta kásiporyn aıasyn odan ári keńeıtip, margarın men maı, quramajem, aýyz sý óndirý kózdelýde. Jylyjaı kesheni de salynbaqshy.
