Batys Qazaqstanda órt taǵy bir adamnyń ómirin jalmady
ORAL. QazAqparat - 23-26 tamyz kúnderi Shyńǵyrlaý aýdanynyń aýmaǵynda órt oqıǵalary oryn aldy, dep habarlaıdy «QazAqparat» tilshisi.
Aýdandyq TJ bóliminen túsken málimetke qaraǵanda, Aqbulaq aýyldyq okrýginde 13800 ga, Qaraǵashta 39 myń ga, Lýbende 16 myń ga, Belogorda 4 myń, Shyńǵyrlaýda 10 ga qurǵaq shóp jandy. Keıbir jerlerde elektr jelileri, orman, pishen de otqa orandy. Qaraǵash aýyldyq okrýgine qarasty Aqsýat eldi mekeninde 43 úı jaryqsyz qaldy. Órtti sóndirýge aýdannyń barlyq tehnıkalary men jergilikti halyq jappaı jumyldyryldy.
Sonymen qatar Bórli, Syrym, Qaratóbe aýdandary jáne Oral qalasynan kelgen órt sóndirýshiler de qatysty. Aqbulaq aýyldyq okrýginde - 7 tehnıka, 25 adam, Qaraǵashta - 11 tehnıka, 110 adam, Lýbende -12 tehnıka, 60 adam, Belogorda - 5 tehnıka, 35 adam, Shyńǵyrlaýdan 5 tehnıka, 35 adam, ortalyqtaǵy mekemelerden, sonyń ishinde orman jáne janýarlar dúnıesin qorǵaý mekemesinen 8 tehnıka, 25 adam, «Shyńǵyrlaýkomtehservıs» mekemesinen -7 tehnıka, 8 adam, órt kúsheıgen shamada qosymsha taǵy 9 tehnıka, 82 adam jiberilip, tórtinshi kún degende «tilsiz jaý» aýyzdyqtaldy. Aýdannan barlyǵy 64 tehnıka, 380 adam jumyldyryldy. Oraldan qos tehnıkamen 25 adam keldi. Shetten kelgenderdi qosqanda, órtti sóndirýge myń shaqty adam qatysty.
Qazirgi kezde órtten kelgen shyǵyn naqtylanýda.
Aýdandyq TJ bóliminiń bastyǵy Erbol Baızenovtiń aıtýynsha, órtten Qaraǵash aýyldyq okrýginiń 1993 jylǵy turǵyny kóz jumdy. Ol 24 tamyz kúni saǵat 13.00-de úıinen jylqy izdeımin dep, shyǵyp ketken. Marqumnyń denesi 25 tamyz kúni saǵat 12.50-de tabyldy.
Eske sala keteıik, budan buryn 30 shilde kúni Qaztalov aýdany Taldyapan aýyldyq okrýginde dalada bolǵan órtten zardap shekken 1990 jylǵy turǵyn keıin kóz jumǵan bolatyn.
