Batys Qazaqstanda órt saldarynan segiz adam kóz jumdy
ORAL. QazAqparat - Bıylǵy jyl basynan 14 qarashaǵa deıin Batys Qazaqstan oblysynda órtten segiz adam kóz jumdy. Bul týraly óńirlik kommýnıkatsııalar qyzmeti alańynda BQO Tótenshe jaǵdaılar departamenti órt qaýipsizdigi salasyndaǵy baqylaý jáne aldyn alý qyzmeti basqarmasy basshysynyń orynbasary, azamattyq qorǵaý maıory Amangeldi Eshmuhanov málim etti, dep habarlaıdy «QazAqparat» tilshisi.
Onyń aıtýynsha, sonymen qatar órt saldarynan 3 adam jaraqat alsa, 17-si ıis tıip ýlanǵan. Oǵan qosa órt shyqpasa da, 13 adam tabıǵı gazdan ýlanǵan. Tek 15 qyrkúıekten beri turǵyn úılerde 80-ge jýyq órt shyǵyp, 2 adam zardap shekti, taǵy ekeýi jaraqat aldy.
«Adamdar úshin eń qaýiptisi - kómirqyshqyl gazy. Bul tússiz, ıissiz, dámsiz gaz bolǵandyqtan, organoleptıkalyq jaǵynan aýada anyqtalmaıdy. Ol kez kelgen jalyn, kólik qozǵaltqyshynan, rettelmegen pesh, páterdegi jáne ózge de oryndardaǵy gaz qubyrlarynyń zaqymdanýynan shyǵýy múmkin. Onyń qaýpi, ásirese, jylý berý maýsymynda kúsheıedi», - dedi A.Eshmuhanov.
BQO energetıka jáne turǵyn úı-kommýnaldyq sharýashylyǵy basqarmasynyń bólim basshysy Nurbaný Satybaldıevanyń bergen málimetine qaraǵanda, jylý berý maýsymy oıdaǵydaı ótýde. Maýsym bastalǵanǵa deıin óńirdegi áleýmettik nysandarǵa (640 bilim berý, 397 densaýlyq saqtaý, 383 áleýmettik nysan) 4,2 myń tonna kómir, 1 myń tonna suıyq otyn jetkizildi. Kúni búgin QR Energetıka mınıstrligi «Jaıyqjylýqýat» AQ-ǵa qosymsha 1500 tonna mazýt bólý máselesin qarastyrýda.
«QazTransGazAımaq» AQ Batys Qazaqstan fılıaly oblys turǵyndaryna tabıǵı gazdy jetkizip, satýmen shuǵyldanady. Fılıalǵa qarasty gaz qubyrlarynyń jalpy uzyndyǵy - 6968,3 km.
«Turǵyndar arasynda júrgizilip jatqan túsinik jumystaryna qaramastan, qaıǵyly jaǵdaılar oryn alýda. Mysaly, ótken jylý berý maýsymynda (2016-2017) oblysta kómirqyshqyl gazben úsh adam ýlanyp, eki adam qaza tapty. Sondaı-aq bıylǵy jylý berý maýsymy bastalǵannan beri eki birdeı qaıǵyly oqıǵa tirkeldi», - dedi «QazTransGazAımaq» AQ BQF dırektorynyń birinshi orynbasary Asylbek Qaıbalıev.
