Batys Qazaqstanda órt qaýpi seıiler emes
ORAL. QazAqparat - Batys Qazaqstan oblysy aýdandarynda kúnniń ystyǵyna baılanysty órt qaýpi seıiler emes, dep habarlaıdy «QazAqparat» tilshisi.
BQO TJ departamentiniń baspasóz hatshysy Nurgúl Muqanovanyń málim etkenindeı, 5 tamyz kúni óńirde birneshe qurǵaq shóptiń janý oqıǵasy tirkeldi. Osy kúni Terekti aýdany Shalqar aýyly mańynda saǵat 18.12-de shyqqan órtten 267 gektar jer otqa oranyp, saǵat 01.29-da sóndirilgen. Sol kúni Zelenov aýdany Kóshim aýyldyq okrýginde Órken eldi mekeni mańynda 160 gektar, Qaztalovtyń Tereńkól aýyldyq okrýginde 224 ga qurǵaq shóp janǵan. Sondaı-aq Jánibek aýdany Kúıgenkól aýyldyq okrýginde Ónege eldi mekeni tusynda 130 gektar jer órtke ketken. 
Búgin túste osy Jánibek aýdanyna qarasty Aqoba aýyly mańynda qurǵaq shóptiń janýy bastalǵan. Turǵyndardyń sózine qaraǵanda, budan eki-úsh kún buryn dalada bolǵan órt sóndirilgenimen, qaıtadan tutanyp ketken. Aýyl ákiminiń mindetin atqarýshy Merlan Erkeǵulov bastaǵan turǵyndar «tilsiz jaýmen» alysýda.
Oblystyń ońtústik aýdandarynda qyryq gradýstan asqan ystyqtyń beti áli qaıtpaı tur. 
Eske sala keteıik, bıyl buǵan deıin oblys aýmaǵynda eki orman (50,3 ga) jáne 19530 gektar jerdi qamtyǵan 208 dala órti tirkelip, janý oqıǵalarynyń kóbeıýine baılanysty Aqjaıyq, Qaztalov aýdandarynda jáne Bókeı ordasynyń Saıqyn aýyldyq okrýginde tótenshe jaǵdaı jarııalanǵan bolatyn.
