Batys Qazaqstanda Oral-Atyraý joly jabyldy

ORAL. QazAqparat – Batys Qazaqstan oblysynda Oral-Atyraý joly jabyldy, dep habarlaıdy QazAqparat tilshisi.

«QazAvtoJol» UK» AQ BQO fılıalynyń málimeti boıynsha respýblıkalyq mańyzy bar atalmysh jolda kúshti boranǵa baılanysty 22 jeltoqsan kúni jergilikti saǵat 23.00-den bastap barlyq kólik túrleri úshin qozǵalysqa shekteý qoıyldy.

Jol Oral qalasynan Aqjaıyq aýdany ortalyǵy Chapaev aýylyna deıingi aralyqta jabyldy.

Osyǵan oraı BQO TJ departamenti eskertý jarııalap, habarlamalar taratýda.

TJ departamenti sondaı-aq 23 jeltoqsan kúni túnde óńirdiń soltústigi men soltústik-shyǵysynda jaıaý burqasyn kóteriletinin jetkizdi. Soltústik-batystan, batystan soǵatyn jeldiń jyldamdyǵy sekýndyna 15-20 metrge jetýi yqtımal.

Oral qalasynda da osyndaı aýa raıy oryn almaqshy.

Eske sala keteıik, budan buryn Batys Qazaqstanda respýblıkalyq jol jabylǵanyn jazǵan bolatynbyz.