Batys Qazaqstanda on jylda 1600 ata-ana balasyna vaktsına saldyrmaı qoıǵan
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkenindeı, 23-30 sáýir aralyǵynda Eýropalyq ımmýndaý aptalyǵy ótip jatyr.
Onyń sózine qaraǵanda, osyǵan oraı Batys Qazaqstan oblysynda aptalyq aıasynda departament BQO densaýlyq saqtaý basqarmasymen birlesken jumys tobyn quryp, josparǵa sáıkes is-sharalardy atqaryp jatyr.
Aptalyq bastalǵannan beri úsh kún ishinde óńirde ata-analarynyń kelisimimen 700-den astam bala qyzylshaǵa qarsy ekpe aldy.
Qazirgi tańda kórshiles oblystarda, Astana men Almaty qalalarynda, Reseı óńirlerinde qyzylshanyń órship otyrǵany málim.
Sondyqtan balalardyń ýaqtyly ekpe alýynyń mańyzy zor.
Nurlybek Ermekulynyń aıtýynsha, DSU usynysy boıynsha turǵyndardyń kem degende 95 paıyzy profılaktıkalyq ekpe alýy qajet. Osy usynba departament tarapynan qadaǵalanyp otyrady.
Onyń málimdeýinshe, sońǵy on jylda 1600-den astam ata-ana balalaryna ekpe saldyrýdan bas tartty.
Munyń sebepteri – áleýmettik jelide jarııalanyp jatqan ekpege qarsy nasıhat, medıtsınalyq qarama-qaıshylyq jáne dinı negiz boıynsha bas tartý.
«Jyl basynan beri Batys Qazaqstan oblysynda qyzylsha bolýy múmkin 3 derek tirkelip, sonyń bireýi zerthanalyq rastaldy. Naýqaspen baılanysta bolǵan adamdar medıtsınalyq baqylaýǵa alyndy. Mektepke deıingi bilim berý uıymdarynda epıdemıologııalyq jaǵdaıdyń nasharlaýyn boldyrmaý úshin sanıtarlyq-epıdemıologııalyq is-sharalardy júrgizý jáne saqtyq sharalaryn saqtaý qajet. Qyzylsha aýyr jaǵdaıda ótse, bronhopnevmonııaǵa, lımfa túıinderiniń qabynýyna, larıngıtke, entsefalıtke ákelýi múmkin. Bala qyzylshaǵa qarsy 1 jáne 6 jasynda egilýi kerek. Turǵyndarǵa aıtarymyz, eger balańyz qandaı da bir sebeptermen qyzylshaǵa qarsy ekpe almaǵan bolsa, jergilikti emhanada vaktsınatsııadan ótý usynylady. Ekpe alý – tegin», -dedi N.Mustaev.
Eske sala keteıik, budan buryn Batys Qazaqstanda jedel ishek ınfektsııasy 14 ese ósip ketkenin jazǵan bolatynbyz.