Batys Qazaqstanda ólgen kıikter sany 2 myńǵa jetti - Orman jáne ańshylyq sharýashylyǵy komıtetiniń tóraǵasy
ASTANA. Mamyrdyń 21-i. QazAqparat /Aıdar Ospanalıev/ - Batys Qazaqstanda ólgen kıikter sany 2 myńǵa jetti.
Bul týraly búgin Aýyl sharýashylyǵy mınıstrliginiń Orman jáne ańshylyq sharýashylyǵy komıtetiniń tóraǵasy Erlan Nysanbaev málim etti, dep habarlaıdy QazAqparat.
Onyń aıtýynsha, Batys Qazaqstan oblysyndaǵy aımaqtyq ınspektsııanyń málimetteri boıynsha, mamyrdyń 18-i kúni Jánibek, Talovka, Qaraoba degen aýyldardyń mańynda 200-deı ólgen kıikterdiń deneleri tabyldy. «Al mamyrdyń 20-sy kúni ol týraly Іshki ister mınıstrligi, Ulttyq qaýipsizdik komıteti, Qorshaǵan ortany qorǵaý mınıstrligi, Bilim jáne ǵylym mınıstrligi sııaqty memlekettik organdarǵa habarlandy», deıdi komıtet tóraǵasy.
Mamyrdyń 20-sy kúni arnaıy komıssııa kıikterdiń óligi tabylǵan aımaqqa tekserýge shyqqanda taǵy 1200 ólgen kıik tapqan.
«Kıikterdiń óliminiń birinshi belgileri, olardyń ishteri keýip ketken, al aýyzdarynan jasyl kóbik aǵyp jatyr. Qazirgi tańda onyń ne sebepti bolǵandyǵy anyqtalýda. Oqıǵanyń saldary zerttelýde. Jaqyn arada biz onyń naqty sebepterin bilemiz degen oıdamyn», dedi E. Nysanbaev.
Onyń málimetterinshe, Batys Qazaqstan aımaǵynda osy ýaqytqa deıin 26 600 kıik bolǵan. Al respýblıka boıynsha, kıikter sany 2003 jyly - 21 myń bolsa, osy ýaqytqa deıin olar 90 myńǵa jetken.
«Búgingi qalyptasyp otyrǵan jaǵdaı biz úshin úlken shyǵyn», dedi Aýyl sharýashylyǵy mınıstrliginiń ókili.
