Batys Qazaqstanda oqýshylardyń jazǵy demalysyn tıimdi uıymdastyrýǵa 195 mln. teńge bólinbek
ORAL. 19 mamyr. QazAqparat - Batys Qazaqstan oblysynda bıyl 58 myńǵa jýyq jetkinshekti nemese oqýshylardyń 70 paıyzyn jazǵy demalys jáne saýyqtyrý sharalarymen qamtý kózdelip otyr.
Oblystyq bilim basqarmasynan túsken málimetke qaraǵanda, bul maqsatqa 195 mln. teńge qarastyrylmaq. Sonyń ishinde 154,9 mln. teńge qazynadan bólinetin bolsa, 40,1 mln. teńge - bıýdjetten tys qarajat. Jazǵy demalysty uıymdastyrýǵa jalpy bilim berý qorynan 71 mln. teńge beriledi. Ata-analardyń úlesi - 20,6 mln. teńge, 19,5 mln. teńge demeýshiler esebinen.
Óńirdegi «Eýrazııa», «Daryn», «Atameken» syndy eń iri úsh lagerinde kúrdeli jóndeý jumystary júrgizilse, 60 oryndyq «Samal» saýyqtyrý lageri jańadan ashylmaq. Oblystaǵy statsıonarlyq lagerler sany 15-ke jetip, 7 myńǵa jýyq oqýshyny qamtymaq. Mektepter janyndaǵy lagerlerge oqýshylardyń 40 paıyzǵa jýyǵy barmaq. Sondaı-aq shatyrly lagerler 30-ǵa jetip, 6 myńǵa tarta oqýshyny demaldyrmaq. Týrızm ortalyqtarynda 9 myńnan astam jetkinshek túrli sharalarǵa qatyspaq.
Oqýshylar aldaǵy jazda Astanaǵa, Aq Jaıyq óńiriniń tarıhı jerlerine, Ońtústik Qazaqstan, Atyraý (Saraıshyq) oblystaryna, Reseı Federatsııasy qalalaryna sapar shegedi.
