Batys Qazaqstanda oqýshy qudyqqa qulap ketti
ASTANA. QazAqparat - Batys Qazaqstan oblysynyń Qaztalov aýdanynda 5-synyp oqýshysy ashyq turǵan qudyqqa qulap ketti. Qudyq aýyldardy sýmen qamtamasyz etý baǵdarlamasy boıynsha bıylǵy jazda salynǵan bolatyn, dep habarlaıdy QazAqparat «Ýralskaıa nedelıa» basylymynyń portalyna silteme jasap.
Qaraózen aýylynda turatyn 11 jastaǵy bala búgin saǵat 11-ler shamasynda mektepten úıine qaıtyp kele jatqan. Qudyqtyń betin qar jaýyp qalǵandyqtan, onyń ashyq bolǵanyn baıqamaǵan. Ony qudyqtan aýla sypyrýshy men mańaıda ótip bara jatqan er adam alyp shyqqan.
Ústi-basy sý bolǵan oqýshy oqıǵa bolǵan jerden bir shaqyrym qashyqtyqta ornalasqan úıine jaıaý qaıtqan. Úıinen ony tońazý belgilerimen ortalyq aýdandyq aýrýhanasyna alyp ketken. Balanyń densaýlyq jaǵdaıy anyqtalýda.
Jergilikti turǵyndar aýyldardy sýmen qamtamasyz etý baǵdarlamasy boıynsha salynǵan qudyqtyń qorshalmaǵanyna narazy. Onyń adam kóp júretin jerde - mektep pen mádenıet saraıynyń arasynda ornalasqanyn aıta ketken jón.
