Batys Qazaqstanda oqýshy balaǵa qasqyr shapty
ASTANA. QazAqparat - 14 qazanda Batys Qazaqstan oblysynyń Qaztalov aýdanyndaǵy Taldyqudyq kentinde 8 synyp oqýshysyna qasqyr shapty, dep habarlaıdy QazAqparat «Moı GOROD» portalyna silteme jasap.
Qaztalov aýdany ákiminiń áleýmettik máseleler jáne ishki saıasat boıynsha orynbasary Záılim Májıtovanyń aıtýyna qaraǵanda, 14 qazanda tańerteń 8 synyp oqýshysy qoılary turǵan qoraǵa barǵan. «Ol qoraǵa kirgende qasqyrdy kórgen, alaıda bóten ıt eken dep oılaǵan. Jyrtqysh balaǵa tap bergen. Alaıda ol qoranyń tóbesine shyǵyp úlgerip, qutylǵan. Ul bala úlkenderdi kómekke shaqyrǵan. Oǵan alǵashqy medıtsınalyq kómek kórsetildi. Saǵat 8.40-ta jasóspirimdi Jalpaqtal aýdandyq aýrýhanasyna jetkizdi, sol jerde oǵan qutyrýǵa qarsy ekpe salyndy. Qasqyr jasóspirimniń oń jaq sanyn qaýyp alǵan. Qazir onyń jaǵdaıy birqalypty», - dedi Záılim Májıtova.
Onyń aıtýynsha, jyrtqyshty jergilikti turǵyndar atyp tastaǵan. «Jyrtqyshtyń qajetti músheleri saraptamaǵa jiberildi. Ol 10 kún ishinde júrgiziledi», - dep atap ótti aýdandyq ákimdiktegiler.
