Batys Qazaqstanda Novopavlovka aýyly Qumaqsaı dep qaıta ataldy

ORAL. QazAqparat – Batys Qazaqstan oblysynda Terekti aýdanynyń Novopavlovka aýylyna Qumaqsaı ataýy berildi, dep habarlaıdy QazAqparat tilshisi.

BQO mádenıet, tilderdi damytý jáne arhıv isi basqarmasynyń basshysy Saıran Dúısenovtiń málim etkenindeı, Batys Qazaqstan oblysy ákimdiginiń 2023 jylǵy 31 mamyrdaǵy №123 qaýlysy jáne Batys Qazaqstan oblystyq máslıhatynyń 2023 jylǵy 31 mamyrdaǵy №3-3 sheshimi negizinde Terekti aýdanynyń Novopavlovka aýyldyq okrýgi – Qumaqsaı aýyldyq okrýgi dep qaıta atalyndy.

Onyń aıtýynsha, sonymen qatar BQO ákimdiginiń 2023 jylǵy 31 mamyrdaǵy №124 qaýlysy jáne BQO máslıhatynyń 2023 jylǵy 31 mamyrdaǵy №3-4 sheshimine sáıkes Jańaqala kolledjine Seıitqalı Mendeshevtiń, Karmanov orta mektebine Dinmuhamed Qonaevtyń esimderin berý týraly jáne Bórli aýdany bilim berý bóliminiń Aleksandrov orta mektebin – Dostyq orta mektebi, Báıterek aýdany bilim berý bóliminiń Chebotarev orta mektebin – Qurmanǵazy orta mektebi, Kırov negizgi orta mektebin – Bolashaq negizgi orta mektebi, Podhoz negizgi orta mektebin Jalyn negizgi orta mektebi dep qaıta ataý boıynsha usynystar respýblıkalyq onomastıkalyq komıssııanyń qaraýyna joldandy.

Basqarma basshysynyń sózine qaraǵanda, memlekettik áleýmettik tapsyrys negizinde qoǵamdyq pikir kóshbasshylaryn tarta otyryp, «Onomastıka – memlekettik ıdeologııanyń negizi» taqyrybynda keshendi kezdesýler, «Men turatyn kósheniń tarıhy» aktsııasy, «Onomastıka – el aınasy» keshendi is-sharalar jáne kórneki aqparattardy rásimdeýde ádistemelik kómek kórsetý úshin «TILGE QURMET» qoǵamdyq til ınspektsııasy qyzmetin uıymdastyrý jobalary boıynsha jumystar júrgizilýde.

«Búgingi tańda 400-ge jýyq bilim berý uıymdary men kásipkerlik nysandaryna «Qazaqstan Respýblıkasyndaǵy til týraly» zańynyń 21-babynyń talaptarynyń saqtalýy boıynsha ádistemelik kómek kórsetilip, oryn alǵan zań buzýshylyqtar joıyldy. Sondaı-aq memlekettik tildiń qoldanys aıasyn keńeıtý maqsatynda oblystaǵy bilim berý, densaýlyq saqtaý, mádenıet uıymdarynyń veb saıttaryndaǵy jáne áleýmettik jelide ornalastyrǵan aqparattaryna monıtorıng júrgizilip, «Qazaqstan Respýblıkasyndaǵy til týraly» zańynyń talaptaryna sáıkestendirildi», dedi QazAqparat tilshisine Saıran Temirǵalıuly.

Eske sala keteıik, budan buryn Batys Qazaqstanda aýdan ortalyǵy Fedorovkanyń ataýy Terekti bolyp ózgergenin jazǵan edik.