Batys Qazaqstanda naızaǵaı túsip, mal qorasy men 125 tonna pishen janyp ketti
ORAL. QazAqparat – Batys Qazaqstan oblysynda mal qorasy men 125 tonna pishen janyp ketti, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 28 mamyr kúni saǵat 20.20-da Tasqala aýdany Mereke aýyldyq okrýgi Qalmaq qystaǵynda «Merlan» sharýa qojalyǵynyń aýmaǵynda boldy.
Naızaǵaı túsip, aýmaǵy 770 sharshy metr mal turatyn bazanyń shatyry men soǵan japsarlas úıilgen 125 tonna (700 sharshy metr, 500 orama) pishen órtendi. Oǵan qosa qora ishindegi 3 tonna arpa otqa orandy.
«Tilsiz jaýdy» aýyzdyqtaýǵa TJ departamentinen 7 qyzmetker, 2 tehnıka, erikti órt sóndirý qurylymdarynan 12 adam, 4 tehnıka jumyldyryldy.
Órt búgin saǵat 04.47-de tolyqtaı sóndirildi. Zardap shekkender joq.
Eske sala keteıik, budan buryn Oralda 3 jasar balanyń tórtinshi qabattan qulap ketkenin jazǵan edik.
