Batys Qazaqstanda naızaǵaı túsip, garaj ben avtokólik órtenip ketti
ORAL. QazAqparat – Batys Qazaqstan oblysynda naızaǵaı túsip, garaj ben avtokólik órtenip ketti, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 3 maýsym kúni saǵat 04.30-da Aqjaıyq aýdany Mergen aýylynda boldy.
M.Áýezov kóshesi 25/2-mekenjaıynda ornalasqan jeke turǵyn úıdiń aýlasynda garaj ben «VAZ-2108» avtokóligi otqa orandy.
Órt aýmaǵy 50 sharshy metrdi qamtydy.
«Tilsiz jaý» №10 órt sóndirý bólimshesiniń kúshimen saǵat 05.33-te oqshaýlanyp, 05.46-da aýyzdyqtaldy.
Zardap shekkender joq.
Aldyn ala málimetke qaraǵanda, órt naızaǵaı túskennen shyqqan.
Óńirde 3 maýsymǵa qaraǵan túni naızaǵaı oınap, nóser jańbyr jaýdy.
Eske sala keteıik, budan buryn Batys Qazaqstanda naızaǵaı túsip, mal qorasy men 125 tonna pishen janyp ketkenin jazǵan bolatynbyz.
Sondaı-aq oblysta taǵy bir jasóspirim sýǵa ketti.
