Batys Qazaqstanda muzdaq saldarynan 20 kıik qyryldy
ORAL. QazAqparat - Batys Qazaqstan oblysynda topyraq betine muzdyń qatýy saldarynan kıikter shyǵynǵa ushyrady, dep habarlaıdy QazAqparat tilshisi.
BQO Orman sharýashylyǵy jáne janýarlar dúnıesi aýmaqtyq ınspektsııasynyń basshysy Qaırat Qadeshevtiń aıtýynsha, barlyǵy 20 kıik ólgen, sonyń 7-eýi - Aqjaıyq, 7 - Bókeı ordasy jáne 6 - Jańaqala aýdandarynda. Olardyń barlyǵy byltyrǵy tólder.
Aqjaıyq aýdanynda 21-22 naýryz kúnderi jańbyr jaýyp, sońy muzdaqqa ulasty. Sonyń saldarynan aýdan ortalyǵy Chapaev aýyly mańynda júrgen kıikter shóp jeı almaı, qıyndyq týyndaǵan. Aqjaıyq aýdany ákimdigimen birlese otyryp, traktordyń kómegimen kıikter shópke jetetindeı jaǵdaı jasaldy.
«Shóp salyp kórip edik, kıikter oǵan jolamady. Sosyn qamysqa deıin jol salyndy. Qazir kıikter qamystyń arasynda, jylqylarmen birge tebindep júr. Janýarlardy sol mańdaǵy qos birdeı ańshylyq sharýashylyǵy baqylaýda. Jalpy, oblysta 100 myńnyń ústinde kıik bar, olardyń negizgi bóligi qazir Qaztalov, Jańaqala jáne Bókeı ordasy aýdandarynda júr. Kıikter negizinen sordyń irgesinde jaıylǵandy jaqsy kóredi. Aqjaıyqta bólek júrgen bir toby ǵana», - dedi «QazAqparat» tilshisine Q.Qadeshev.
foto:zhaikpress.kz
