Batys Qazaqstanda munaı ónimderin óńdeıtin jańa qondyrǵy iske qosyldy
Kompanııanyń baspasóz qyzmetinen túsken málimetke qaraǵanda, qurylys bir jylǵa jýyq merzimge sozylyp, bir aı boıy iske qosý-retteý jumystary júrgizilgen. Mamandar 16 shaqyrymnan astam qubyr tartyp, 1 myń tonnadaı metall qurylmalaryn jáne jalpy kólemi 4 myń tekshe metr jeti rezervýardy turǵyzǵan.
Jańa qondyrǵy aýyr munaı ónimderin óńdep, aqshyl munaı ónimderin shyǵarýdy 90 paıyzǵa deıin arttyrýǵa múmkindik beredi.
«Kondensat» AQ-nyń bas dırektory Edýard Júnisovtiń aıtýynsha, qazirdiń ózinde naryqta úlken suranysqa ıe jol jáne jabyn bıtýmdaryn óndirý úshin paıdalanylatyn 1 myń tonnadaı gýdron shyǵarylǵan. Sonymen qatar 2,5 myń tonnadaı vakýýmdy gazoıl óndirilgen. Dızeldi otyn, benzın jáne maılaıtyn maı óndirýge jumsalatyn vakýýmdy gazoıldy Qazaqstan, Reseı jáne alys shet elderdegi munaı óńdeıtin kásiporyndarǵa jóneltý kózdelýde. Gazoıldyń alǵashqy legi Fınlıandııaǵa jiberilýde.
Atalmysh joba quny - 168,6 mln. AQSh dollary. «Qazaqstan Damý banki» AQ qajetti qarjylandyrýdyń 70 paıyzdan astamyn kótergen, qaryzdy 11 jylǵa deıin qaıtarý kózdelgen.
Aıta keteıik, «Kondensat» AQ bıyl 418 myń tonna munaı ónimderin, sonyń ishinde 113 myń tonna AI-92 benzınin, 14 myń tonna AI-95 benzınin, 23 myń tonna dızeldi otyn, 134 myń tonna tike aıdalatyn gazoıl fraktsııasyn, 74 myń tonna vakýýmdy gazoıl, 16 myń tonna gýdron, 15 myń tonna qazandyq otynyn óndirýdi josparlap otyr.
