Batys Qazaqstanda maýsymda 2200-ge jýyq adamnan koronavırýs anyqtaldy
ORAL. QazAqparat – Batys Qazaqstan oblysynda maýsym aıynda 2178 adamnan koronavırýs anyqtaldy. Bul týraly oblys ákimi Ǵalı Esqalıevtiń tóraǵalyq etýimen ótkenóńirlik jedel shtab otyrysynda aıtyldy, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamentiniń basshysy Muhamǵalı Aryspaevtyń málim etkenindeı, jaǵdaıdyń kúrdelenýine baılanysty oblysta 28 maýsymnan bastap karantındik shekteý sharalary kúsheıtildi.
Epıdemıolog mamandardyń boljamyna qaraǵanda, osy aıda qoǵamdyq kólikterde betperdesiz júrý saldarynan 1524, úı oshaǵynda buryn aýyrǵandarmen qarym-qatynasta bolǵan 556, eske alý is-sharalary, úılený jáne basqa toılarǵa qatysqan 98 adamnan indet tabyldy.
M.Aryspaevtyń sózine qaraǵanda, meıramhanalarda toı ótkizý tyıylmaı otyr. Mysaly, «Qorjyn» meıramhanasy 25 maýsymda, «Samal» kafesi 25 jáne 26 maýsymda toı ótkizgen. Bul nysandardyń ıelerine hattama toltyrylyp, olardy jabý jóninde ekonomıkalyq sotqa materıal beriletin bolady. Karantındik talaptardy buzǵan basqa da toıhanalarǵa qatysty tıisti sharalar alynady.
Osy aıda monıtorıngtik toptar barlyǵy 279 reıd ótkizip, 1451 nysandy qamtydy. 30 nysanda sanıtarlyq talapty buzýshylyq anyqtaldy. 889 685 teńgege 7 ákimshilik hattama
toltyryldy.
Maýsym aıynda syrqattanǵandardyń 38,7 paıyzy (843) – jumys isteıtinder, 19,3 paıyzy (422) – jumyssyzdar, 19,1 paıyzy (416) – zeınetkerler, 9,5 paıyzy (207) – oqýshylar,
4,1 paıyzy (90) – muǵalimder.
Departament basshynyń aıtýynsha, aýyrǵandardyń jas erekshelikteri boıynsha 14 jasqa deıingiler – 250, 15-17 jastaǵylar – 94, 18-25-tegiler – 177, 26-40-taǵylar – 578, 41-60-taǵylar – 627, 60 jáne odan joǵarylar – 452. KVI-ge shaldyqqandardyń basym kópshiligi – 41-60 jastaǵylar.
Jıynda indettiń taralýyna jol bermeý úshin karantındik talaptardy saqtaý, monıtorıngtik toptardyń jumysyn shıratý, turǵyndar arasynda vaktsınatsııalaý qarqynyn
arttyrý qajettigi atalyp ótildi.
Eske sala keteıik, budan buryn BQO-da ınfektsııalyq statsıonarda jatqandar sany 500-den asqanyn jazǵan bolatynbyz.
