Batys Qazaqstanda mashınaǵa tıelgen bes jylqy tirideı janyp ketti

Jańaqala aýdandyq «Jańarǵan óńir» gazetiniń tilshisi Nurǵalı Ǵabbasovtyń naqtylaýynsha, 25 mamyr kúni Jańajol aýyldyq okrýginiń ortalyǵy Aıdarhan aýylyndaǵy sońǵy qońyraý merekesine oraı 20 jáne 30 jyldyq mektep túlekteri at jarysyn uıymdastyrǵan. Atalmysh jarysqa aýyldyq okrýgterden 50-ge tarta báıge aty qatysqan. Merekelik sharanyń sońy másteksaılyq shabandozdar úshin qaıǵyly oqıǵamen aıaqtaldy.

At jarysynda qaıtar jolda oqys oqıǵa oryn alyp, báıgege shapqan tulparlar otqa orandy. Naqtyraq aıtqanda, Másteksaı aýylynyń turǵyndary Erbolat Ibrashev, Nurjan Meńdalıev jáne Serikbol Aıýpov esimdi azamattar Aıdarhan  aýylynda ótken  at jarysyna 5 at alyp keledi. Jarys aıaqtalǵan soń attaryn «GAZel» avtokóligine tıep, aýyldaryna qaraı bet alady. Aıdarhan aýylynan 2-3 shaqyrym shyǵa bere avtokóliktiń jabyq qorabynyń ishindegi at astyna tósegen saban shópten órt shyǵyp, sáıgúlikter tirideı janyp ketti.

-Avtokóligimizdiń janyp kele jatqanyn Aıdarhannan 2-3 shaqyrym shyǵa bere baıqadyq. Basynda avtokólik qorabynyń ishindegi jylqylardyń dúrsilin estigenmen, joldyń shoqalaǵynan jylqylar teńselip, qulap kele jatqan shyǵar dep asa mán bere qoımadyq. Jáne avtomagnıtola daýsynan jylqylardyń dúbirin estı almaı qaldyq. Otty baıqap, tejegishti basqan kezde bári kesh boldy. Jylqylar janyp ketken. Onyń ishinde aýyldasym Nurjan Meńdalıevtiń úsh jylqysy, Aıýpov Serikbolsyn degen oqýshy balanyń jáne ózimniń sáıgúligim  boldy. Endi ottyń qaıdan shyqqanyn naqty bile almaı otyrmyz. Degenmen mashınadan laqtyrylǵan shylym tuqyly túsip ketýi múmkin. Sebebi avtokólik qorabynyń ishinde eshqandaı janǵysh zat bolǵan joq, - dedi avtokólik ıesi Erbolat Ibrashev. 

Eskertý: Vıdeoda bylapyt sózder kezdesedi

Janyp ketken qylquıryqtardyń ekeýi quny qymbat turatyn asyl tuqymdy júırikter bolsa, úsheýi - jergilikti jaby tuqymdy jylqylar. Kólik ishindegi adamdar aman.

Aıta keteıik, atalmysh oqıǵa áleýmettik jelide qyzý talqylanýda.