Batys Qazaqstanda mas kúıinde rýlge otyrǵan 534 júrgizýshi jaýapkershilikke tartyldy
BQO polıtsııa departamentiniń baspasóz qyzmeti málim etkenindeı, óńirde osy aıda avtokólikti mas kúıinde aıdaǵan 69 adam tirkeldi.
Keshe QR Ákimshilik quqyqbuzýshylyq kodeksiniń 608-babyn buzǵan 3 júrgizýshi anyqtaldy. Endi olar kólik quralyn basqarý quqyǵynan aıyrylyp, 15 táýlikke ákimshilik qamalýy múmkin.
Tipti bir mas júrgizýshi 20 sáýir kúni eki ret jol-kólik oqıǵasyn jasady. Shamamen saǵat 00.30-da 1993 jylǵy K. degen júrgizýshi «VAZ-21102» avtokóligimen kele jatyp, 1988 jylǵy júrgizýshi aıdaǵan Toyota Corolla avtokóligin soqqan. Sodan Toyota Corolla jolda turǵan Volkswagen Passat avtokóligine qaǵyp ótken. Budan keıin sol jerden qashyp ketken K. saǵat 01.00-de rýlge ıe bola almaı, qarsy betke shyǵyp ketip, jol shetinde turǵan Mersedes Benz markaly avtobýsqa soǵylyp toqtaǵan. Medıtsınalyq kýálandyrý nátıjesi K-nyń mas kúıinde bolǵanyn kórsetti.
Jol-kólik oqıǵasy saldarynan avtokólik ıelerine eleýli túrde zııan keltirildi.
Mas júrgizýshige QR Ákimshilik quqyqbuzýshylyq kodeksi 608-baby 3-bóligine sáıkes hattama toltyryldy. Bul bap boıynsha 7 jylǵa kólik quralyn basqarý quqyǵynan aıyra otyryp, 15 táýlikke deıin ákimshilik qamaýǵa alý túrindegi jaza qarastyrylǵan. Júrgizýshi sonymen qatar kólik ıelerine shyǵyndy óteıdi.
BQO polıtsııa departamentiniń málimetine qaraǵanda, kóptegen qylmysty turǵyndar mas kúıde jasaıdy. Osynyń aldyn alý maqsatynda bir táýlik ishinde ýaqytsha beıimdeý jáne detoksıkatsııa ortalyǵyna 21 mas adam jetkizildi. Bulardyń sany jyl basynan beri 2 215-ke, sáýir aıynda 506-ǵa jetti.
Sondaı-aq ishimdik ishkeni nemese qoǵamdyq orynǵa mas kúıinde kelgeni úshin QR Ákimshilik quqyqbuzýshylyq kodeksiniń 440-babyna sáıkes bıyl 2 556, sonyń ishinde sáýirde 178, bir táýlik ishinde 10 adam jaýapkershilikke tartyldy.