Batys Qazaqstanda «Qyzǵaldaq kóktem» halyqaralyq án baıqaýy ótti
ORAL. QazAqparat - Batys Qazaqstanda «Qyzǵaldaq kóktem» atty estradalyq ánderdi oryndaýshylardyń І halyqaralyq án baıqaýy márege jetti, dep habarlaıdy QazAqparat tilshisi.
Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyna sáıkes «Týǵan jer» baǵdarlamasy aıasynda Qaztalov aýdanynda alǵash ret uıymdastyrylǵan óner merekesine Qazaqstan óńirlerimen qatar Reseıdiń Orynbor, Saratov, Samara oblystarynan otyzǵa jýyq úmitker qatysyp, baq synady.
Elge tanymal óner adamdary qazylyq jasaǵan baıqaýda jas ánshiler bes tilde án shyrqady.
Saıys qorytyndysynda qaztalovtyq Aıymbek Sártókov bas júldeni jeńip aldy. Oraldyq Damır Satybaev birinshi, Terekti aýdanynan kelgen Aıbek Dáýletqalıev pen oraldyq Taras Jaýymbaev ekinshi, qaztalovtyq Ashat Nyǵmetov, taǵy bir oraldyq Azamat Amangeldi jáne syrymdyq Asyl Ábýǵalıeva úshinshi orynǵa ıe boldy.
Aýdan ákimi Abat Shynybekovtiń aıtýynsha, Qaıyńdy aýyly mańyndaǵy qyzǵaldaqty alqap jyl saıyn kóktemde ásem kórkimen erekshelenedi. Sondyqtan Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan ıdeıalar aıasynda festıvaldi sol qyzǵaldaqty mekennen bastaý uıǵaryldy. Etnoaýylda kıiz úıler tigilip, qonaqtar qazaq halqynyń ejelgi ulttyq qolóneri, taǵamdary, zergerlik buıymdary men kıimderi, salt-dástúrlerimen tanysty. Sadaq atý, aýdaryspaq, kúres, kúsh synasý sekildi ulttyq oıyndardy tamashalady. Qazaqtyń kúıleri oryndalyp, qyzǵaldaqqa arnalǵan óleńder oqyldy. Al velojoryqqa qatysýshylar aýdan ortalyǵy Qaztalovtan Qaıyńdynyń qyzǵaldaqty alqabyna deıingi 150 shaqyrym aralyqty júrip ótti. Festıval aıasynda halyqaralyq án baıqaýy da joǵary deńgeıde ótti.
«Búgingi jas urpaqty óz Otanyn súıýge tárbıeleý, atameken, týǵan jerin qurmetteýge baýlý maqsatynda «Qyzǵaldaq kóktem» festıvalin jyl saıyn ótkizbekshimiz. Al halyqaralyq án baıqaýyn eki jylda bir ret uıymdastyrý kózdelýde», dedi «QazAqparat» tilshisine Abat Abaıuly. 
