Batys Qazaqstanda qyrylǵan kıikterdiń sany 3 myń 271-di qurady. Olarǵa pastrellez dıagnozy qoıyldy - AShM
ASTANA. Mamyrdyń 24-i. QazAqparat /Qanat Mámetqazyuly/ - Batys Qazaqstan oblysynda qyrylǵan kıikterdiń sany 3 myń 271 basty quraıdy. Mamandar kıikterdiń pastrellez aýrýyna shaldyqqanyn anyqtap otyr.
Bul týraly búgin QR Aýyl shaýashylyǵy mınıstrliginde ótken baspasóz máslıhatynda málim boldy, dep habarlaıdy QazAqparat.
Agroónerkásip keshenindegi Memlekettik ınspektsııa komıteti tóraǵasynyń orynbasary Ahmetjan Sultanovtyń aıtýynsha, mamyrdyń 19-ynda alǵash ret Batys Qazaqstan oblysy Jánibek aýdanynyń Borsy, Jaqsybaı aýyldyq okýrýgteri aýmaǵynda 200-ge tarta kıiktiń ólgeni tirkelgen. Mamyrdyń 20-synda bul oqıǵa boıynsha arnaıy komıssııa qurylyp, sol kúnderi 1 myń 200-ge tarta kıiktiń qyrylǵany anyqtaldy.
«Klınıkalyq zertteýlerde kıikter óliminiń alǵashqy belgileri retinde olardyń ishteri keýip ketkeni, al aýyzdarynan jasyl kóbik aqqany anyqtaldy. Ólekselerdi zertteý barysynda olardyń pastrellez aýrýyna shaldyqqany anyqtalyp otyr. Búgingi, mamyrdyń 24-indegi málimet boıynsha, qyrylǵan kıikterdiń sany 3 myń 271 basty qurady jáne kıikterdiń qyrylýy tek shekteýli aýmaqtarda ǵana oryn alǵany belgili boldy. Osyǵan oraı jergilikti atqarýshy organdar pastrellez aýrýyna baılanysty birqatar shekteýler qoıyp otyr. Qazirgi tańda kıiktiń ólikterin jınap, olardy joıý, dezınfektsııalaý jumystary júrgizilýde. Sonymen bir mezgilde, Jánibek aýdanyndaǵy Borsy, Jaqsybaı aýyldyq okrýgterinde úı janýarlaryn vaktsınatsııalaý sharalary da qolǵa alynýda. Kıikter qyrylǵan mańdaǵy topyraqtar, sýlardan, shópten synama úlgileri alynyp, bular dıagnozdy naqtylaý úshin oblystyq zerthanaǵa jóneltildi», dedi A. Sultanov.
Esterińizge sala keteıik, qazirgi tańda Qazaqstanda meken etken kıikterdiń sany 90 myńǵa jetip otyr. Jalpy, elimizde kıikterdiń úsh túri meken etetin bolsa, Batys Qazaqstan oblysyndaǵy qyrylǵan kıikter «oraldyq» túrge jatady. Olardyń bul aýmaqtaǵy sany osy ýaqytqa deıin 26 myń 600 bolǵan.
