Batys Qazaqstanda qyryqqabat baǵasy 17,6 paıyzǵa ósti
QR Saýda jáne ıntegratsııa mınıstrligi BQO boıynsha saýda jáne tutynýshylardyń quqyqtaryn qorǵaý departamentiniń basshysy Baqdáýlet Ibraımovtyń óńirlik kommýnıkatsııalar qyzmeti alańynda ótken brıfıngte málim etkenindeı, jyl basynan beri áleýmettik mańyzy bar azyq-túlik taýarlary baǵasynyń ındeksi 103,3 paıyz (sońǵy aptada, 25 mamyrǵa – 100,1 paıyz) boldy.
Onyń sózine qaraǵanda, qyryqqabattyń baǵasy 17,6, pııaz ben sábiz 5 paıyzǵa kóterilse, esesine qaraqumyq 1,8, jumyrtqa 2,5, kúnbaǵys 1,5 paıyzǵa tómendedi.
«Kókónis baǵasynyń ósýi maýsymaralyq kezeńmen baılanysty. Óıtkeni oblystaǵy kókónis qoımalarynda byltyrǵy ónim taýsyldy. Bıyl jańa pisken kókónis túrleri ońtústik óńirlerden, sonymen qatar Tájikstan, Ózbekstan sekildi syrt elderden ákelinip jatyr», deıdi Baqdáýlet Talǵatuly.
Óńirde 19 áleýmettik mańyzy bar azyq-túlik taýarlarynyń qaraqumyq, kúrish, tuz jáne qanttan basqa 15 túri óndiriledi. Oblys turǵyndary sıyr eti, un, makaron ónimderi, kúnbaǵys maıy, taýyq jumyrtqasy, kartop, sábizben jetkilikti mólsherde qamtamasyz etilgen. Degenmen keıbir taýarlar jetkiliksiz, sonyń ishinde sút ónimderimen turǵyndar 20-25 paıyz qamtylǵan. Bul – sút ónimderiniń basym bóligi syrttan ákelinedi degen sóz.
Bıyl oblys ákimdigimen jáne «Aqjaiyq» ÁKK«AQ-men birlesip oblystyń barlyq kókónis qoımalaryna taldaý júrgizilip, qujattary jasaldy. Qoldanystaǵy 55 qoımanyń 20-synda kókónis ónimderin uzaq ýaqyt saqtaýǵa múmkindik beretin zamanaýı jabdyqtar bar.
Departament basshysynyń aıtýynsha, bıyl qys jáne kóktem mezgilinde bazarǵa qaraǵanda, sýpermarketterde kókónis ónimderiniń baǵasy tómen boldy. Munyń sebebi – jergilikti sýpermarket jelileriniń kókónis qoımasy bar óndirýshilermen tikeleı kelisimshart jasaýyna baılanysty ónim baǵasy tómendedi.
Budan basqa saýda jelileri men oblys ákimdigi áleýmettik mańyzy bar 19 azyq-túlik taýarynyń baǵasy boıynsha saýda ústemesin 10 paıyzdan asyrmaı satý boıynsha memorandýmǵa qol qoıdy.
Sonymen qatar oblys ákiminiń birinshi orynbasarynyń tóraǵalyǵymen deldaldyq shemalardy tergeý jónindegi komıssııa jumys isteıdi. Sonyń nátıjesinde iri saýda jelilerine joǵary baǵamen áleýmettik mańyzy bar azyq-túlik taýarlaryn jetkizetin deldaldar joıyldy.
«Departament ár seısenbi jáne juma kúnderi áleýmettik mańyzy bar azyq-túlik taýarlar baǵasyna monıtorıng júrgizedi. Іri bazarlardy, sýpermarketter men úı mańyndaǵy dúkenderdi qamtımyz. Eger sýpermarket jelilerinde bári ashyq bolsa, elektrondy shot-faktýralar boıynsha taýar qandaı baǵamen satyp alynǵanyn jáne qandaı ústemeaqy qosylǵanyn qadaǵalaı alasyz, al bazarlar men úı mańyndaǵy dúkenderde másele bar. Tıisti qujattardyń bolmaýyna baılanysty kóptegen jaǵdaıda taýardyń qandaı baǵamen satyp alynǵanyn jáne qansha paıyz ústemaqy qosylǵanyn tekserý qıyndyqqa soǵady», dedi B.Ibraımov.
Bes aıdyń qorytyndysy boıynsha departamentke oblys turǵyndarynan tek eki ótinish túsken. Birinshi ótinish pııazdy joǵary baǵamen satýǵa qatysty bolsa, ekinshisi Bórli aýdanynan, sóredegi jáne kassadaǵy baǵanyń sáıkes kelmeýi. Buǵan baılanysty kásipker ákimshilik jaýapkershilikke tartylyp, 10 AEK kóleminde aıyppul salyndy.
Taǵy bir aıta ketetin jaıt, qala ákimdigimen jáne «Aqjaiyq»ÁKK«AQ-men birlesip, baǵany turaqtandyrý maqsatynda oblys baǵbandaryna ósirilgen ónimdi satýǵa járdemdesý úshin eki baǵytta pılottyq joba qolǵa alyndy. Birinshisi – Oral qalasynyń «Altyn alma», «Mırlan» jáne «El yrysy» bazarlarynda tegin saýda oryndaryn usyný arqyly daıyn ónimdi satýǵa kómektesý, ekinshi baǵyt – oblysta arnaıy ortalyqtandyrylǵan operator belgilendi. Operator jergilikti baǵbandardan kókónis ónimderin satyp alýǵa daıyn.
