Batys Qazaqstanda qylmys deńgeıi 8,5 paıyzǵa tómendedi

ORAL. QazAqparat – Batys Qazaqstan oblysynda quqyq buzýshylyq sany 8,5 paıyzǵa tómendedi. Bul týraly BQO polıtsııa departamentinde ótken jyl qorytyndysyna arnalǵan keńeste aıtyldy, dep habarlaıdy QazAqparat tilshisi.

BQO polıtsııa departamentiniń bastyǵy, polıtsııa general-maıory Maqsuthan Ablazımovtyń atap ótkenindeı, jalpy óńirdegi jedel jaǵdaı men qoǵamdyq-saıası ahýal turaqty.

Onyń sózine qaraǵanda, bıyl ishki ister organdarynyń qyzmetin baǵalaý kezinde negizgi ólshem bolyp tabylatyn aýyr jáne asa aýyr qylmystardy ashý kórsetkishi artty.

Jalpy, qylmystyń barlyq túrleri boıynsha olardy ashý paıyzynyń óskeni baıqalady.

«Memleket basshysynyń Іshki ister mınıstrliginiń keńeıtilgen alqa otyrysynda bergen tapsyrmasyna sáıkes mal urlyǵyna qarsy jumystar atqarylýda. Maqsatty jedel izdestirý is-sharalary barysynda mal urlyǵymen aınalysqan 9 qylmystyq toptyń áreketi áshkerelendi. Sonymen qatar esirtki qylmysyna qarsy is-qımyl nátıjesinde 82 kg astam esirtki zaty tárkilendi», dedi M.Ablazımov.

Sondaı-aq Prezıdenttiń Qazaqstan halqyna Joldaýynda aıtylǵan «Halyq únine qulaq asatyn memleket» tujyrymdamasy aıasynda oblysta qazan aıynan bastap oblys aýmaǵynda polıtsııa jumysynyń servıstik modelin engizý baǵytynda pılottyq joba júzege asyrylýda.

Keńes sońynda departament aldyna jedel-qyzmettik jumystyń kórsetkishin jaqsartý jáne halyqtyń polıtsııaǵa degen senimin arttyrý baǵytynda naqty mindetter qoıyldy.