Batys Qazaqstanda kúshti jel ǵımarattardyń shatyryn julyp áketti
ORAL. QazAqparat – Batys Qazaqstan oblysynda kúshti jel ǵımarattardyń shatyryn julyp áketti, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 29 maýsym kúni keshkisin Jańaqala jáne Kaztalov aýdandarynda boldy.
Ekpini sekýndyna 19 metrge deıin jetken jeldiń saldarynan saǵat 20.50-de Jańaqala aýdany Jańaqala aýylynda alańy 215 sharshy metr qos qabatty mýzeı ǵımaratynyń shatyry sypyrylyp tústi. Ǵımarat 1982 jyly salynǵan. 2015 jyly sońǵy jóndeý jasalǵan.
Sondaı-aq Kaztalov aýdany Taldyapan aýylynda 2 qabatty mektep ǵımaratynyń shatyry (alańy 600 sharshy metr) qulady. 1982 jyly salynǵan mekteptiń jalpy aýdany – 3150 sharshy metr. Sońǵy jóndeý 2010 jyly júrgizilgen.
Zardap shekkender joq. Qazirgi kezde keltirilgen shyǵyn anyqtalyp jatyr.
Eske sala keteıik, budan buryn Oralda eki kólik soqtyǵysyp, 2 adamnyń aýrýhanaǵa túskenin jazǵan bolatynbyz.
