Batys Qazaqstanda kúshti jel ǵımarattardyń shatyrlaryn julyp áketti
ORAL. QazAqparat – Batys Qazaqstan oblysynda kúshti jel ǵımarattardyń shatyrlaryn julyp áketti, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa búgin Oral qalasy men oblystyń birqatar aýdandarynda oryn aldy.
Atap aıtqanda, Qaztalov aýdany Jańajol aýylynda saǵat 16.15-te kúshti jel saldarynan orta mekteptiń shatyry (120 sharshy metr) sypyrylyp tústi. Aýdan ortalyǵy Qaztalov aýylynda «Qazposhta» AQ bólimshesi ǵımaratynyń jylý ustaıtyn jabyny da (25 sharshy metr) shydamady.
Saǵat 16.30-da Jánibek aýdany Jánibek aýylynda M.Yqsanov atyndaǵy kolledj sport zalynyń shatyry (24 sharshy metr) qulady.
Tasqala aýdany Tasqala aýylynda saǵat 15.40-ta jel halyqty jumyspen qamtý ortalyǵynyń shatyryn (225 sharshy metr) julyp áketti.
Oral qalasynda saǵat 17.20-da M.Ótemisov atyndaǵy Batys Qazaqstan memlekettik ýnıversıteti ǵımaratynyń 40 sharshy metr jylý ustaıtyn qaptamasy (alıýkobond) qulady. Sonymen qatar Zachagan kenti Qambar batyr kóshesi, 6 jáne Oraldaǵy ıÝ.Gagarın kóshesi ¼ mekenjaılaryndaǵy úılerdiń proflısteriniń qulaý qaýpi týyndaǵany jóninde málimet tústi.
Oǵan qosa turǵyndar qala kóshelerinde aǵashtardyń qulap, avtokólikterdi basyp qalǵany jóninde habarlaýda.
Oblystyq densaýlyq saqtaý basqarmasy baspasóz qyzmetiniń habarlaýynsha, qalada Ábilqaıyr han dańǵylynda avtokólikke úlken butaq qulaǵan. Sonyń saldarynan kózinen jaraqat alǵan 1988 jylǵy er adam, sondaı-aq 2003 jylǵy qyz qalalyq kópbeıindi aýrýhanaǵa jetkizildi. Jelaev kentinde shıferdiń kesegi 2011 jylǵy qyzdyń basyna qulaǵan. Qyz qalalyq aýrýhanaǵa jetkizildi. N.Nazarbaev dańǵylynda butaq 1950 jáne 1945 jylǵy áıeldiń basyna túsken. Onyń birinshisi aýrýhanaǵa jatýdan bas tartty. Ekinshisi qalalyq aýrýhanaǵa jetkizildi.
Qazirgi ýaqytta aqparattar naqtylaný ústinde.
