Batys Qazaqstanda qos birdeı basqarmanyń basshysy aýysty (FOTO)

ORAL. QazAqparat - Batys Qazaqstan oblysynyń ákimi Nurlan Noǵaevtyń ókimderimen Arman Serikuly Óksikbaev BQO qurylys basqarmasynyń, Mırjan Munaıdaruly Satqanov BQO kásipkerlik jáne ındýstrıaldyq-ınnovatsııalyq damý basqarmasynyń basshysy bolyp taǵaıyndaldy.

Osyǵan oraı oblys ákiminiń birinshi orynbasary Arman Óteǵulov qos basqarma ujymdaryna jańa basshylaryn tanystyryp, olardyń qyzmetine sáttilik tiledi.

Oblys ákiminiń baspasóz qyzmetinen túsken málimetke qaraǵanda, A.S.Óksikbaev 1976 jyly dúnıege kelgen, bilimi joǵary. 1999 jyly Oral qurylys tehnıkýmyn, 2005 jyly Samara memlekettik sáýlet-qurylys ýnıversıtetin tehnık-tehnolog, óndiristik-azamattyq qurylys ınjeneri mamandyqtary boıynsha bitirgen. 1999 jyly «Metallıst» zaýytynda qurylys-jóndeý bóliminiń ustasy bolyp eńbek jolyn bastaǵan Arman Serikuly sodan beri qurylys salasynda eńbek etip keledi. Sonyń ishinde 2011-2013 jyldary Oral qalasy qurylys bóliminiń bastyǵy, 2013 jyldan BQO qurylys basqarmasy basshysynyń orynbasary boldy.

M.M.Satqanov 1977 jyly dúnıege kelgen, bilimi joǵary. 2000 jyly Túrkııa Respýblıkasy Dokýz Eılıýl ýnıversıtetin ekonomıst mamandyǵy boıynsha bitirgen ol 2001 jyly Oral qalalyq qarjy bóliminiń jetekshi mamany bolyp eńbek jolyn bastady. Sodan keıin Mırjan Munaıdaruly BQO kásipkerlikti qoldaý jáne damytý departamentiniń bas mamany, bólim bastyǵy, osy mekeme bastyǵynyń orynbasary boldy, basqa da qyzmetterdi atqardy. 2013 jyldan Batys Qazaqstan oblysy kásipkerlik jáne ındýstrıaldyq-ınnovatsııalyq damý basqarmasy basshysynyń orynbasary boldy.