Batys Qazaqstanda qos birdeı avtojoldy aqyly etý kózdelýde
ORAL. QazAqparat - Batys Qazaqstanda qos birdeı avtojoldy aqyly etý kózdelýde, dep habarlaıdy QazAqparat tilshisi.
BQO jolaýshylar kóligi jáne avtomobıl joldary basqarmasy basshysynyń mindetin atqarýshy Medet Shaqaevtyń búgin óńirlik kommýnıkatsııalar qyzmetinde málim etkenindeı, QR Investıtsııalar jáne damý mınıstrligi 2022 jylǵa deıin Oral-Tasqala jáne Samara-Shymkent kúre joldaryn aqyly etýdi josparlap otyr.
Sonymen qatar oblystyq basqarma memlekettik-jekeshelik áriptestik baǵdarlamasy aıasynda bıyl oblystyq mańyzy bar Chapaev-Jańaqala-Saıqyn jolyn 5 jyl merzimge servıstik qamtamasyz etý pılottyq jobasyn qolǵa aldy. Konkýrs jeńimpazy «Jolaýshy-Jol» JShS-men 1 mlrd 177,555 mln astam teńgege kelisimshart jasaldy. Bul rette atap ótetin jaıt, qyzmet kórsetý merzimin ulǵaıtý kásiporynǵa jańa tehnıka men jabdyqtar alyp, damýyna múmkindik beredi. Basqa oblystyq joldar qyzmet kórsetýge úsh jyl merzimge berildi.
Aıta keteıik, Oral-Tasqala-RF shekarasy joly «Nurly jol» baǵdarlamasy aıasynda 23,2 mlrd teńgege qaıta jańǵyrtylyp jatqany belgili. Bıyl osy baǵyttaǵy 56,3 km jol qaıta salynbaqshy. Buǵan kúni búgin 4,9 mlrd teńge bólingen. Jyl ishinde qosymsha qarjylandyrylatyn bolady.
Jalpy, 2018 jyly 28,3 mlrd teńgege 436 km joldy jóndeý kózdelýde. Sonyń ishinde respýblıkalyq mańyzy bar 282 km jolǵa 10,8 mlrd teńge qaraldy. Oblystyq mańyzy bar joldardy (76,5 km) jóndeýge 7,4 mlrd teńge jumsalmaq. Sondaı-aq aýdandyq mańyzy bar joldar men eldi mekender kóshelerin (40,6 km) jóndeýge 4,2 mlrd teńge bólindi. Oral qalasynyń kóshelerin (37 km) jóndeýge 6 mlrd teńge ketpek.
Osylaısha jyl sońynda jaqsy jáne qanaǵattanarlyq jaǵdaıdaǵy avtojol úlesin 28,5 paıyzǵa jetkizý josparlanýda.
