Batys Qazaqstanda koronavırýstan qaıtqandar sany kóbeıdi
ORAL. QazAqparat – Batys Qazaqstan oblysynda koronavırýstan qaıtqandar sany kóbeıip ketip otyr, dep habarlaıdy QazAqparat tilshisi.
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń málim etkenindeı, óńirde osy kezge deıin koronavırýs juqtyrǵan 22833 adam tirkeldi.
Sonyń 17927-si nemese 78,5 paıyzy jazylyp shyqty.
Pandemııa bastalǵannan beri 341 adam kóz jumsa, sonyń ishinde 2020 jyly 169, bıylǵy bes aıda 171 adam ómirden ótti.
Arman Talǵatulynyń sózine qaraǵanda, kóktem aılarynda koronavırýstan qaıtqandar sany kóbeıdi. Naýryzda 30, sáýirde 42, mamyrda 56 adam dúnıeden ozdy.
Bıyl qaıtqandardyń 88-i áıelder bolsa, 83-i – er adamdar.
Naýqastardyń 91 paıyzynda (156) sozylmaly dertteri bolǵan. Sonyń 75 paıyzy júrek-qan tamyrlary aýrýlary, 13 paıyzy qant dıabeti, 12 paıyzy basqa dertke shaldyqqan.
«Qazirgi tańda 1123 tósektik 18 ınfektsııalyq statsıonarda 397 adam emdelýde. Sonyń ishinde 26-sy jansaqtaý bóliminde jatsa, 65,3 paıyzy nemese 17-si – alpys jastan asqandar.
Naýqastardyń 21-i júrek-qan tamyrlary aýrýlary, úsheýi qant dıabetimen syrqattanady. Koronavırýs alpys jastan asqandar úshin asa qaýipti. Sozylmaly aýrýlary barlardy emdeý qıynǵa soǵady. Sondyqtan jasy ulǵaıǵan turǵyndardyń adamdar kóp jınalatyn jerlerge, qonaqtyqqa barmaı, sanıtarlyq talaptardy saqtaǵany jón», dedi A.Qalıbekov.
Eske sala keteıik, budan buryn Batys Qazaqstanda sońǵy on kúnde 20 oqýshydan koronavırýs tabylǵanyn, óńirde 70 myńǵa jýyq adamnyń egilgenin jazǵan bolatynbyz.
