Batys Qazaqstanda koronavırýsqa shaldyqqan 7 adam aýyr halde jatyr
ORAL. QazAqparat – Batys Qazaqstan oblysynyń juqpaly aýrýlar aýrýhanasynda 143 naýqas koronavırýstan emdelip jatyr. Bul týraly brıfıngte BQO densaýlyq saqtaý basqarmasynyń basshysy Bolatbek Qaıýpov málim etti, dep habarlaıdy QazAqparat tilshisi.
Onyń aıtýynsha, sonyń 8-i – bala. 52 naýqas jeńil, 78-i ortasha halde.
«Qazirgi tańda jeti naýqastyń jaǵdaıy aýyr. Sonyń tórteýi jasandy tynys alý apparatyna qosylǵan», dedi B.Qaıýpov.
Sondaı-aq 18 adam provızorlyq, 130 adam karantındik statsıonarda jatyr.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń málim etkenindeı, kúni búginge deıin óńirde 818 naýqas 262 oshaqta tirkeldi.
Solardyń 326-sy – syrttan kelgender (205-i – Reseıden, 119-y – Atyraýdan, bireýi – Germanııa, taǵy biri – Belarýstan).
Aýyrǵandardyń 54 paıyzy nemese 442-si – buryn aýyrǵandarmen qarym-qatynasta bolǵandar. Sonyń ishinde 106-sy – medıtsına qyzmetkerleri.
Іndettiń kópshiligi (633-i) Oralda tirkelgenimen, sonymen qatar oblys aýdandarynda da kóbeıip barady. Atap aıtqanda, Aqjaıyq aýdanynda – 5, Bókeı ordasynda – 2, Bórlide – 15, Jańaqalada – 4, Jánibekte – 11, Báıterekte – 34, Qaztalovta – 1, Qaratóbede – 2, Syrymda – 12, Tasqalada – 28, Terektide – 20, Shyńǵyrlaýda 2 adam syrqattanǵan.
«Qazirgi kezde Syrym aýdany Jympıty, Tasqala aýdany Tasqala, Jánibek aýdany Qamysty jáne Borsy aýyldarynda karantın saqtalyp otyr. Sonymen aýrý anyqtalýyna baılanysty Qaratóbe aýdany Saraljyn aýyldyq okrýgi de jabylyp, blokposttar qoıyldy. Oblysta jaǵdaı áli de qolaısyz bolyp otyr», dedi N.Mustaev.
Sonymen qatar oblysta 3 maýsymnan bastap klınıkalyq belgileri joq 166 adam tirkeldi, olar úılerinde oqshaýlanyp, karantınde bolady.
Eske sala keteıik, budan buryn Batys Qazaqstanda koronavırýstan áıel adamnyń kóz jumǵanyn jazǵan bolatynbyz.
