Batys Qazaqstanda koronavırýsqa shaldyqqan 58 naýqas aýyr halde jatyr
ORAL. QazAqparat – Batys Qazaqstan oblysynda juqpaly aýrýlar statsıonarynda 512 adam emdelýde, dep habarlaıdy QazAqparat tilshisi.
BQO densaýlyq saqtaý basqarmasynyń basshysy Bolatbek Qaıýpovtyń brıfıngte málim etkenindeı, sonyń 13-i – balalar, 13-i – júkti áıelder.
Aýyrǵandar ishinde 19-y jeńil, 435-i ortasha, 58-i aýyr halde. 349 adam pnevmonııamen syrqattansa, sonyń 9-y – balalar. 14 eresek adam jasandy tynys alý apparatyna qosylǵan.
Senbi jáne jeksenbi kúnderi aýrýhanaǵa 86 adam tústi.
«Oblysta juqpaly aýrýlar aýrýhanasyna qosymsha qalalyq kópbeıindi aýrýhanada 389, Aqjaıyq aýdandyq aýrýhanasynda 30, Bórlide 30, Báıterekte 6 oryn ashyldy. Óńirde medıtsınalyq kómek kórsetilgender sany eki ese kóbeıdi. Teń sońǵy táýlikterde jedel járdemge myńnan astam qońyraý shalyndy. Oblysta dári-dármek tapshylyǵy men mamandardyń jetispeýshiligin sheshý maqsatynda tıisti sharalar alynýda», dedi B.Qaıýpov.
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Muhamǵalı Aryspaevtyń aıtýynsha, 28 maýsym kúni 95 derek tirkelse, sonyń 42-si – aýrý belgisi bar naýqastar. Qalǵan 53-i – klınıkalyq belgileri joqtar.
42 adamnyń 22-si – buryn koronavırýs juqtyrǵandarmen qarym-qatynasta bolǵandar. Ekeýinen epıdemıologııalyq qadaǵalaý boıynsha synama alynsa, 18 adam óz betinshe medıtsınalyq kómekke júgingen.
Kúni búginge deıin oblysta 1431 naýqas 821 oshaqta tirkeldi. Aýrýshańdyq kórsetkishi 100 myń turǵynǵa shaqqanda 218,0-den keledi.
Sonymen qatar 3-28 maýsym aralyǵynda klınıkalyq belgileri joq 1071 tasymaldaýshy tirkeldi. Oblysta barlyǵy 893 adam jazylyp shyqty.
Óńirde osy aıdyń ózinde 761 adam koronavırýs juqtyrsa, sonyń 332-si nemese 43,1 paıyzy – buryn syrqattanǵandarmen baılanysta bolǵandar. Sonsha adam medıtsınalyq kómekke júgingen.
M.Aryspaev oblysta qosymsha shekteý sharalary engizilgenine qaramastan, ásirese, saýda oryndary, shashtaraz, dúkenderde sanıtarlyq talaptardyń saqtalmaı otyrǵanyn jetkizdi. Osyǵan baılanysty 43 hattama toltyrylyp, materıal sotqa joldandy.
Eske sala keteıik, budan buryn Batys Qazaqstanda pnevmonııamen aýyrǵandar sany 273-ke jetkenin jazǵan bolatynbyz.
