Batys Qazaqstanda koronavırýsqa shaldyǵý kórsetkishiniń tómendegeni baıqalady

BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindeı, óńirde epıdemıologııalyq ahýal salystyrmaly túrde turaqty deýge bolady.

18 tamyz kúni koronavırýs juqpasymen óńirde 28 adam tirkelse, sonyń 20-sy – klınıkalyq belgileri joq, 8-i – aýrý belgisi bar naýqastar. 8 naýqastyń bireýi buryn aýyrǵan adammen qarym-qatynasta bolsa, jeteýi ózdiginen medıtsınalyq kómekke júgingen.

Keshe anyqtalǵandardyń 16-sy Oral qalasynda, bireýi Bórli aýdanynda, 8-i Báıterekte, ekeýi Terektide, bireýi Qaratóbede tirkelgen.

Sońǵy kezde oblystyń kópshilik aýdanynda indettiń azaıa bastaǵany kórinedi. Mysaly, 16 tamyz kúngi málimet boıynsha birde-bir aýdanda koronavırýs tirkelgen joq (24 naýqastyń bári de Oraldan shyqty). 17 tamyzda 22 adamnyń juqtyrǵany anyqtalsa, sonyń 11-i Oralǵa, qalǵan jartysy qalaǵa jaqyn ornalasqan Báıterek aýdanyna tıesili.

Kúni búginge deıin oblysta 6611 adamnyń koronavırýs juqtyrǵany belgili boldy. Sonyń 3247-si aýrý belgisi barlar bolsa, 3364-iniń eshqandaı sımptomdary joq.

Óńirde 5537 adam jazylyp shyqsa, ókinishke qaraı, 86 naýqas kóz jumdy.

1-18 tamyz aralyǵynda oblysta 408 adam syrqattansa, sonyń 74-i nemese 18,1 paıyzy buryn aýyrǵandarmen baılanysta bolǵan. 52 patsıentten (12,7 paıyz) profılaktıkalyq maqsatta, 16-synan (3,9 paıyz) epıdemıologııalyq qadaǵalaý boıynsha synama alynǵan. 266 naýqas (65,1 paıyz) JRVJ belgilerimen dárigerge qaralǵan.

Syrqattanýshylyqtyń ósim kórsetkishi 17 jáne 18 tamyzda 0,2 paıyz boldy.

Departament mamandarynyń aıtýynsha, jaǵdaı turaqtalyp kele jatyr eken dep arqany keńge salýǵa bolmaıdy. Turǵyndardyń betperde kıip, ara qashyqtyqty saqtap, adam kóp jınalatyn jerlerge barmaǵany jón.

Eske sala keteıik, budan buryn BQO-da epıdemıologııalyq jaǵdaıdy turaqtandyrý úshin 115 mobıldi brıgada qurylǵanyn jazǵan bolatynbyz.