Batys Qazaqstanda koronavırýsqa qarsy ekpe jumystary bastaldy
ORAL. QazAqparat - Batys Qazaqstan oblysynda koronavırýsqa qarsy ekpe jumystary bastaldy, dep habarlaıdy QazAqparat tilshisi.
BQO densaýlyq saqtaý basqarmasynyń basshysy mindetin atqarýshy Arman Qalıbekovtiń málim etkenindeı, óńirge 1 myń doza reseılik «Spýtnık V» vaktsınasy jetkizildi.
Onyń sózine qaraǵanda, vaktsına keshe Nur-Sultan qalasynan Aqtóbege ushaqpen ákelindi. Odan keıin arnaıy kólikpen búgin tańmen Oralǵa jetkizilgen vaktsına qazirgi kezde oblystyq qan ortalyǵynda tońazytqysh kamerasynda saqtalynýda.
«Birinshi kezekte koronavırýs juqtyrý qaýpi joǵary ınfektsııalyq statsıonarlar, jedel járdem, qabyldaý jáne jansaqtaý bólimderi, emhana, basqa da emdeý mekemeleriniń qyzmetkerleri egiledi», dedi Arman Talǵatuly.
Onyń aıtýynsha, jasy 18-ge tolmaǵandarǵa jáne 65-ten asqandarǵa ekpe salynbaıdy. Al koronavırýstyń orta jáne aýyr túrimen aýyrǵandar 6, jeńil syrqattanǵandar men sımptomy joqtar 2 aıdan keıin saldyra alady.
Vaktsına hladoelementteri bar termokonteınerlermen tasymaldanady. Tońazytqyshtan alynǵannan keıin ekpe eki saǵattan artyq ustalmaýy qajet. Ár vaktsınada 3 mıllımetr doza 5 adamǵa jetedi.
Ekpe 6 qalalyq emhana men medıtsına ortalyqtaryndaǵy egý kabınetterinde egiletin adamnyń kelisimimen jasalady. Áýeli dáriger qarap, qyzýyn ólsheıdi. Egilgen adam jarty saǵat baqylaýda bolyp, úıine jiberiledi. Onyń halin úsh kún boıy medıtsına qyzmetkerleri habarlasyp, bilip otyrady. Alǵash egilgennen keıin 21-inshi kúni ekpeni sol adam qaıta alady. Bul joly ekpeniń dozasy kúshtirek bolady. Sóıtip koronavırýsqa qarsy antıdene qalyptasady.
«Aldyn ala málimet boıynsha 10 aqpanǵa qaraı vaktsına taǵy da jetkiziledi. Koronavırýstyń betin qaıtarý úshin qolǵa alynǵan asa mańyzdy is-shara osylaı jalǵasa beredi», dedi A.Qalıbekov.
Eske sala keteıik, budan buryn BQO-da koronavırýsqa qarsy 180 myńnan astam adamdy egý josparlanyp otyrǵanyn jazǵan bolatynbyz.
