Batys Qazaqstanda koronavırýs juqtyrý kórsetkishi 99,1 paıyzǵa ósti
BQO densaýlyq saqtaý basqarmasynyń basshysy Arman Qalıbekovtiń óńirlik kommýnıkatsııalar qyzmeti alańynda ótken brıfıngide málim etkenindeı, ótken aımen salystyrǵanda, indet juqtyrý kórsetkishi 99,1 paıyzǵa ósti (maýsymda 4 naýqas tirkeldi).
Pandemııa bastalǵannan beri 49 794, bıyl 9 797 adam syrqattandy.
Arman Talǵatulynyń sózine qaraǵanda, ınfektsııalyq statsıonarǵa túskender sany da kúrt artyp keledi. Mysaly, 14 shildege deıin aýrýhanalarda 1 adam em alsa, bir aptanyń ishinde naýqastar sany 33-ke jetip, 97 paıyzǵa ósti.
Sonymen qatar KVI-ge shaldyqqan jaǵdaıda balalar men júkti jáne ekiqabat áıelderge medıtsınalyq kómek kórsetý maqsatynda oblystyq perınataldyq ortalyqtan, qalalyq kópbeıindi aýrýhananyń bosandyrý bóliminen jáne oblystyq kópbeıindi balalar aýrýhanasynan 32 tósek-oryn qaıta beıimdeldi.
Qazirgi tańda jansaqtaý bóliminde jatqan aýyr naýqastar joq. 165 adam ambýlatorlyq em alýda.
Basqarma basshysynyń aıtýynsha, KVI-ge qarsy kúrestiń eń tıimdi ári senimdi joly vaktsınatsııa ekendigi jalpyǵa málim. Oblys boıynsha «Pfizer» kompanııasy óndirgen Comirnaty vaktsınasynyń 1 500-ge jýyq, qytaılyq Vero Cell vaktsınasynyń 50 myńǵa jýyq jáne otandyq QazVac vaktsınasynyń 12 myńdaı dozasy bar. Sonyń ishinde Comirnaty jáne Vero Cell vaktsınalary Dúnıejúzilik Densaýlyq saqtaý uıymymen (DDU) maquldanǵan.
Kúni búgin óńirde 278 186 adam (jospardyń 67,1 paıyzy) І, 269 729-y (65,1 paıyzy) ІІ komponentpen egildi..
«Pfizer» kompanııasynyń vaktsınasyn 20 215 adam alsa, 456-sy – júkti, 5 291-i – bala emizetin áıelder, 6 511-i – jasóspirimder, 16-sy – múgedekter, 7 941-i – basqa sanattaǵylar.
Oblys boıynsha 102 792 adam (51,3 paıyz) revaktsınatsııadan ótti. 6 443 adam (42,3 paıyz) qaıta revaktsınatsııa jasady.
«Vedomstvoaralyq komıssııada kóterilgen taǵy bir másele – revaktsınatsııalaý. QR óńirleri reıtıngisinde revaktsınatsııa boıynsha 17 aımaqtyń ishinen 15-orynda turmyz. Bul – basqa óńirlermen salystyrǵanda, revaktsınatsııalaý deńgeıi aıtarlyqtaı tómen degen sóz. QR Densaýlyq saqtaý mınıstrliginiń aqparatyna sáıkes aýyrǵandardyń 89 paıyzy – vaktsına almaǵandar nemese ekpe alǵannan keıin alty aıdan astam ýaqyt ótken adamdar. Mınıstrlik usynysyna sáıkes turǵyndar arasynda ujymdyq ımmýnıtet qalyptastyrý úshin revaktsınatsııamen qamtý deńgeıi 65 paıyz bolýy shart. Sondyqtan eki komponent alǵannan keıin alty aı merzim ótken adamdar revaktsınatsııadan ótýi qajet. Al revaktsınatsııa alǵannan keıin alty aı ótkender qaıta ekpe alýy kerek. JRVI belgileri, entigý, qurǵaq jótel paıda bolyp, ıis sezý joǵalǵan jaǵdaıda birden medıtsınalyq kómekke júgingen durys. Oblystyń barlyq emhanalarynda betperde rejımi, súzgi kabıneti men mobıldi brıgadalar jumysy qalpyna keltirildi», dedi A.Qalıbekov.
Eske sala keteıik, budan buryn BQO-da sońǵy aptada koronavırýs juqtyrý kórsetkishi 72 paıyzǵa óskenin jazǵan edik.
